Qazaqstandyqtar kún saıyn tsıfrlyq bankıngpen 21,3 mln astam operatsııa júrgizedi

ASTANA. QazAqparat – Bıylǵy І toqsanda Qazaqstan bankteriniń tólem kartochkasyn paıdalanýshylar 73,5 trln teńgege 5,4 mlrd operatsııa júrgizdi, dep habarlaıdy QazAqparat Ulttyq bankke silteme jasap.

Qazaqstannyń tólem kartochkalary naryǵy ósý dınamıkasyn kórsetip keledi. 2023 jyldyń birinshi jartyjyldyǵynda Qazaqstan bankteri shyǵarǵan tólem kartochkalarymen 73,5 trln teńgege 5,4 mlrd operatsııa júrgizildi.

Qolma-qol aqshasyz operatsııalardyń da kólemi óskeni baıqalady. Jeke tulǵalar Qazaqstan emıtentteriniń tólem kartochkalarymen qolma-qol aqshasyz 62,8 trln teńgege 5,3 mlrd operatsııa júrgizdi. Bul – 2022 jylǵy kórsetkishten 1,4 ese artyq.

Qolma-qol aqshany sheship alý operatsııalarynyń sany 2022 jylǵy osy kezeńmen salystyrǵanda 7,6%-ǵa azaıdy.

Qolma-qol aqshasyz operatsııalar júrgizýde ınternet-bankıng pen mobıldi-bankıng – qazaqstandyqtar arasynda óte joǵary suranysqa ıe tásil. Qolma-qol aqshasyz on operatsııanyń toǵyzy onlaın rejımde júzege asyrylady.

2023 jyldyń 1-jartyjyldyǵynda qolma-qol aqshasyz operatsııalardyń jalpy qurylymyndaǵy onlaın operatsııalardyń úlesi – sany jaǵynan 73,5%, al kólemi jaǵynan 85,8% boldy. Kún saıyn tsıfrlyq bankıng arqyly orta eseppen 297,7 mlrd teńgeden astam somaǵa 21,3 mıllıonnan artyq operatsııa júrgiziledi.

2023 jylǵy 1 shildedegi derekter boıynsha, belsendi tólem kartochkalarynyń jalpy sany – 36,4 mln birlik (2022 jylǵy maýsym aıymen salystyrǵanda 20,4%-ǵa kóp).

Taýarlar men qyzmetterge aqy tóleý ınfraqurylymy edáýir keńeıdi. Tóleýge tólem kartochkalaryn qabyldaıtyn saýda kásiporyndarynyń sany 1,8 ese ósti (2023 jylǵy maýsym aıynda – 702 482 kásiporyn).

Kásipkerlerdegi jáne bankterdegi POS-termınaldardyń sany 1,4 ese ósip, 934,1 myń birlikke jetti. Naryqtaǵy 90,7% POS-termınal QR-kodty paıdalaný arqyly tólem jasaý fýnktsııasyn qoldaıdy.