Qazaqstandyqtar kólik salyǵyn jyl sońyna deıin tóleýi tıis

ASTANA. QazAqparat - Qazaqstandaǵy avtokólik ıeleri temir tulparlary úshin salyq boıynsha bereshekti 31 jeltoqsannan keshiktirmeı óteýi tıis, dep habarlaıdy QazAqparat.

«Qaryz somasy qalyptasqan jaǵdaıda, salyq tóleýshiler kólikke salyq boıynsha mindettemeni oryndaýy tıis. Tólem jasaý merzimi jyl saıyn 31 jeltoqsannan kesh bolmaýy kerek», - dep atap ótilgen «QazAqparattyń» resmı saýalyna QR QM Memlekettik kirister komıtetinen berilgen jaýapta.

Vedomstvoda naqtylap ótkendeı, salyq tóleýshiler sanatyna Qazaqstanda tirkelgen nemese esepte turǵan avtokóligi bar jeke tulǵalar jatady. Sonymen birge kólikke arnalǵan salyq stavkasy avtokólik qozǵaltqyshynyń túri men qýatyna baılanysty belgilenedi.

Kólik ıesi tarapynan salyq tólenbese nemese tolyq ótelmese, onda qaryz somasyn májbúrli óndirip alýdyń sharalary qabyldanady. Avtokólikti basqa adamǵa satý jaǵdaıynda ony qaıta tirkeý men esepten shyǵarý úshin tapsyrýshy tarap barlyq salyqty tóleýi tıis. Kólikti satý kezinde eseptelgen salyqtyq bereshek týraly málimetti azamattar mamandandyrylǵan halyqqa qyzmet kórsetý ortalyqtarynan jáne tirkelgen jerindegi salyq organynan bile alady. 

Atap aıtqanda, salyq boıynsha bereshek somasy nemese onyń joqtyǵy týraly aqparatty avtokólik ıeleri QR QM Memlekettik kirister komıtetiniń saıtynan (kgd.gov.kz) bile alady. Sonymen qatar call-ortalyq ta jumys istep tur.