Qazaqstandyqtar kóbine ne úshin ajyrasady
Vedomstvonyń málimetinshe, osy jyldyń 1 shildesinen bastap «Neke (erli-zaıyptylyq) jáne otbasy týraly» Kodekstiń 1-baby 1-tarmaǵynyń 2-tarmaqshasyna sáıkes, «Azamattarǵa arnalǵan úkimet» memlekettik korporatsııasy azamattyq hal aktilerin tirkeýshi organ sanalady. Korporatsııa azamattyq hal aktilerin memlekettik tirkeýdi jáne azamattyq hal aktilerin memlekettik tirkeýge baılanysty memlekettik kórsetiletin qyzmetterdiń basqa da túrlerin júzege asyrady. Al, Ádilet mınıstrligine memlekettik derekter qorlaryn jáne aqparattyq júıelerdi júrgizý, ádistemelik jáne normatıvtik qamtamasyz etý fýnktsııalary qaldyryldy. Tirkeýshi organ qyzmetin «AHAJ tirkeý pýnkti» aqparattyq júıesi arqyly elektrondy túrde júrgizedi.
«Tirkeýshi organ kámeletke tolmaǵan balalary joq jáne erli-zaıyptylyqqa qatysty daýlar boıynsha nekeni erli-zaıyptylardyń ózara kelisimi negizinde buzýy múmkin. Azamattar ózara kelisimi boıynsha ajyrasýǵa ótinish bergen kezde, ajyrasýynyń negizgi sebebin «minezderiniń kelispeýshiligi» dep kórsetedi. Nekelerdiń basym bóligi sot sheshimi negizinde buzylǵan», - dep atap ótedi mınıstrlikten agenttikti resmı saýalyna oraı.
Elimizde 2020 jyldan bastap sot sheshimi negizinde neke buzýdy tirkeý tártibi avtomattandyrylǵan. Atalǵan málimetter «AHAJ tirkeý pýnkti» aqparattyq júıesine Joǵarǵy sottyń «Tórelik» aqparattyq júıesinen kelip túsedi jáne neke qııý týraly akti jazbasyna nekeniń buzylǵandyǵy týraly belgi qoıylady.
«AHAJ tirkeý pýnkti» aqparattyq júıesi málimetterine sáıkes, 2022 jyldyń 1 jartyjyldyǵynda kámeletke tolmaǵan balalary joq erli-zaıyptylardyń nekesin (erli-zaıyptylyǵyn) buzýǵa ózara kelisken kezde tirkeýshi organdarda nekeni buzý týraly 9 192 akt tirkelgen. 2023 jyldyń 1 jartyjyldyǵynda nekeni buzý týraly 8 345 akt tirkelip otyr», - dedi vedomstvodan.