Qazaqstandyqtar kóbinde qandaı aýrýlardan qaıtys bolady

ASTANA. QazAqparat – Otandastarymyz jıi shaldyǵatyn aýrý túrleri belgili boldy, dep habarlaıdy QazAqparat tilshisi.

«2021 jylmen salystyrǵanda ótken jyly aýrýǵa shaldyǵý kórsetkishi 5,7%-ǵa tómendep, 48301,40 qurady. Sońǵy jyldary azamattar kóbine tynys alý organdary aýrýlaryna jıi ushyraıdy (2021 jyly – 21964,12, 2022 jyly – 18883,3). Ekinshi orynda - as qorytý júıesiniń aýrýlary (2021 jyly – 3981,2, 2022 jyly – 3691). Otandastarymyz jıi shaldyǵatyn kelesi dert qan aınalymy júıesine qatysty (2021 jyly – 3000,6, 2022 jyly –2759,6)», - degen jaýap keldi Densaýlyq saqtaý mınıstrliginen QazAqparat tilshisi joldaǵan saýalǵa.

Sondaı-aq, atalǵan vedomstvo ulttyq statıstıka bıýrosynyń bıylǵy 6 aıdaǵy ólim-jitim jaıly málimetin usyndy.

«Ólim kórsetkishi ótken jylmen salystyrǵanda 9,3% tómendedi. Ólim-jitimge jıi alyp keletin - qan aınalym júıesi aýrýlary. Ol boıynsha bıyl 6 aıda 147,22 adam qaıtys bolǵan. Ekinshi orynda - qaterlik isik túrleri, bıyl jarty jylda 66,13 ólim tirkeldi. Úshinshi kezekte tynys alý organdary aýrýlary, ol 64,42 adamdy ólimge alyp kelgen», - deıdi mınıstrlikten.

Aıta ketsek, bıyl jarty jylda medıtsına sapasyna 4,6 myńnan astam shaǵym túsken.

Sondaı-aq shetelden kelgen qazaqstandyqtardyń kóbinde qandaı aýrý, ınfektsııa nemese vırýs juqtyryp keletini belgili boldy.