Qazaqstandyqtar qazaq tiline aýdarylǵan termınderdi talqylaýǵa qatysa alady
«Til komıtetiniń saıtynda «Talqylanatyn termınder» atty rýbrıka bar. Onda respýblıkalyq termınologııalyq komıssııa bekitkenge deıin talqylanatyn termınder jarııalanady. Onda kez kelgen adam sózdiń aýdarmasyna qatysty óz kózqarasyn bildire alady. Qazirgi ýaqytta Tilderdi damytý jáne qoldanýdyń 2011-2020 jyldarǵa arnalǵan memlekettik baǵdarlamasyn júzege asyrý aıasynda bekitilgen termınder jınaǵy jaryqqa shyǵaryldy jáne bekitilgen termınderdiń etımologııalyq jınaǵy shyǵarylmaq», - dedi komıssııa hatshysy.
Onyń atap ótýinshe, komısııa otyrystarynda negizinen túrli maǵynaǵa ıe omonımder men aýdarylýy qıyn termınder qaralady. Bul rette komıssııa qaraýyna engiziletin naqty sózderiń sany joq. Máselen, 2013 jyly 4 otyrys ótkizilip, onda shamamen 350 termın men 15 sózdik maquldanǵan. Al aǵymdaǵy jyly bir ǵana otyrys ótip, onda 42 termın bekitilgen. Jalpy, osy ýaqytqa deıin shamamen 10 myń termın maquldandy.
«Komıssııa otyrystardy termınderdi aýdarmaıtyndyǵyn, tek memlekettik organdar engizgen usynystar negizinde bekitetindigin atap ótkim keledi. Árıne, komıssııa músheleri óz nusqalaryn da usyna alady. Biraq, komıssııa velosıpedti shaıtanarba dep aýdarǵan sııaqty absýrdty sózderdi bekitpeıdi», - dedi S.Sálemov.
Aıta keterligi, komıssııa barlyq kózderdi maquldaǵannan keıin olar «Egemen Qazaqstan», «Ana tili» respýblıkalyq gazetterinde, «Termınologııalyq habarshy» bıýlleteninde, Til komıtetiniń saıtynda jarııalanyp, ortalyq jáne jergilikti atqarýshy organdarǵa jiberiledi.