Qazaqstandyqtar qandaı qyzmetterge jıi shaǵymdanady

ASTANA. QazAqparat – Otandyq tutynýshylardan túsetin shaǵym sany artyp otyr. Ótken jyly tutynýshylardan 50 myńǵa jýyq ótinish túken. Bul týraly Saýda jáne ıntegratsııa mınıstrligi tutynýshylar quqyǵyn qorǵaý komıtetiniń tóraǵasy Asqar Tynysbekov málim etti, dep habarlaıdy QazAqparat tilshisi.

«Tutynýshylar quqyǵy buzylǵany týraly shaǵymdar jyl saıyn 20%-ǵa ósedi. Ótken jyly bizdiń mınıstrlik 30,2 myńnan astam ótinishti qarady. Osyndaı jaǵdaı ózge memlekettik organdar boıynsha da baıqaldy. Ótken jyly tutynýshylardan 50 myńǵa jýyq ótinish kelip tústi. Shaǵymdar kóbine bólshek saýda (48%), turmystyq qyzmetter (19%), elektrondy saýda (9%) jáne turǵyn úı kommýnaldyq sharýashylyǵy qyzmetterine (5,6%) qatysty», - dedi Asqar Tynysbekov ortalyq kommýnıkatsııalar qyzmeti alańynda ótken baspasóz máslıhatynda.

Komıtet basshysynyń aıtýynsha, tutynýshylar tarapynan qoǵamdyq tamaqtaný, kólik, medıtsına jáne baılanys qyzmetteri boıynsha aryz-shaǵym sany azaımaı tur.

«Tutynýshylar shaǵymynyń sany istiń naqty jaı-kúıin kórsetpeıtinin túsiný kerek. Óıtkeni, quqyǵy men zańdy múddeleri buzylǵan barlyq azamat memlekettik organdarǵa júgine bermeıdi. Ony áleýmettik saýalnama nátıjesi rastap otyr», - deıdi ol.