Qazaqstandyqtar ınternet-saýdaǵa qatysty 772 shaǵym túsirgen

NUR-SULTAN. QazAqparat – QR Saýda jáne ıntegratsııa mınıstrligi tutynýshylardyń quqyqtaryn qorǵaý komıteti tóraǵasynyń orynbasary Serik Qusaıynov qazaqstandyqtardan elektrondyq saýda boıynsha qandaı aryz-shaǵymdar jıi túsetinin málim etti, dep habarlaıdy QazAqparat tilshisi.

«Elektrondyq saýdaǵa qatysty shaǵymnyń deni taýar jáne satýshy týraly aqparattyń bolmaýy, taýardyń berilgen sıpattamaǵa sáıkes kelmeýi, ınternet-saıttardyń taýardy keri alyp, aqshany qaıtarýdan bas tartýyna qatysty. Sondaı-aq elektrondyq saýda boıynsha alaıaqtyq faktilerge qatysty shaǵymdar da bar. 2022 jylǵy bes aıdyń ishinde 772 ótinish nemese shaǵym kelip tústi. Bul jalpy kelip túsken shaǵymnyń 8,3% quraıdy», - dedi Serik Qusaıynov Egov.kz portalynda ótken ınternet konferentsııada tutynýshylardyń suraǵyna jaýap bere otyryp.

Onyń aıtýynsha, tutynýshylardan turǵyn úı-kommýnaldyq sharýashylyǵyna qatysty da shaǵymdar túsedi.

«Atap aıtsaq, ótinishter men shaǵymdar kommýnaldyq qyzmetterdiń sapasyz kórsetilýi, tarıfterdi negizsiz kóterý, elektr energııasyn esepteý quraldaryn zańsyz tekserý jáne aýystyrýmen baılanysty. Sonymen qosa elektr jelilerin zańsyz alý jáne gaz taratý kompanııalaryna qatysty shaǵymdar jıilep ketti. Bıylǵy 5 aıda atalǵan sala boıynsha 454 ótinish nemese shaǵym tústi. Bul jalpy shaǵymnyń 5% qurap otyr. Al ótken jyly turǵyn úı-kommýnaldyq sharýashylyǵyna qatysty 408 ótinish-shaǵym túsken edi», - deıdi ol.

Sondaı-aq komıtet basshysynyń orynbasary tutynýshylardan kelip túsetin jalpy ótinish, shaǵym 2021 jylmen salystyrǵanda 2% azaıǵanyn aıtyp otyr.