Qazaqstandyqtar ınternet saýda arqyly qandaı taýarlardy kóptep satyp alady

NUR-SULTAN. QazAqparat - Ulttyq ekonomıka mınıstrligi Saýda qyzmetin retteý departamentiniń dırektory Aıjan Bıjanova qazaqstandyqtardyń ınternet saýda arqyly kóptep satyp alatyn taýar túrlerin atady, dep habarlaıdy QazAqparat tilshisi.

«Qazirdiń ózinde biz júrgizilgen jumystardyń oń áserin baıqap otyrmyz. 2018 jyly elektrondyq saýda naryǵynyń kólemi 2017 jylmen salystyrǵanda 2 esege jýyq ulǵaıdy. Internet arqyly satyp alýshylardyń sany 2 ese artyp, 2,3 mln adamǵa jetti. Naryqta 1700-den asa ınternet-dúken jumys isteýde. Qazirgi ýaqytta elektrondy saýdaǵa qatysty taýar aınalymynda 270 mlrd teńge júr» - deıdi Aıjan Bıjanova Ortalyq kommýnıkatsııalar qyzmetinde ótken baspasóz máslıhatynda.

Departament basshysynyń aıtýyna qaraǵanda, qazaqstandyqtar ınternet saýdany aıtarlyqtaı deńgeıde meńgerip alǵan.

«Biz turaqty túrde ınternet saýda arqyly bıznes-sýbektileri men qarapaıym satyp alýshylar kóp satyp alatyn taýarlarǵa jáne qyzmetterge taldaý júrgizip otyramyz. Shynynda da, belgili bir dınamıka bar. Eń birinshi kezekte, bizde ınternet resýrsy arqyly kóp jaǵdaıda qurylys materıaldary satyp alynady. Odan bólek, turmystyq tehnıkalardy, mobıldi telefondardy ınternet arqyly satyp alýshylar mol. Sońǵy ýaqytta kosmetıkalyq zattardy, kıimdi ınternet saýda arqyly alýshylar kóbeıip keledi», - deıdi Aıjan Bıjanova.