Qazaqstandyqtar Halyqaralyq Olımpıada kúnin atap ótti

ASTANA. QazAqparat - Keshe Qazaqstan halqy jyldaǵy dástúr boıynsha Halyqaralyq Olımpıada kúnin atap ótip, elimizdiń barlyq óńirinde buqaralyq-sporttyq sharalar uıymdastyryldy, dep habarlaıdy QazAqparat tilshisi.

QR UOK-niń baspasóz qyzmeti málim etkendeı bıyl eń basty olımpıadalyq merekelerdiń birin álemdegi sportsúıer qaýym 70-shi ret toılap otyr. Mereıtoı qurmetine oraı, Halyqaralyq Olımpıada komıteti bar álemdegi sport jankúıerleri men salaýatty ómir saltyn qoldaýshylardy birigýge shaqyratyn #UnitedBy kampanııasyn iske qosty.

Astana turǵyndary jeksenbilik tańdy Astanalyq saıabaqtaǵy fıtnes-jattyǵýdan bastady. Bul sharaǵa tanymal otandyq sportshylar, Olımpıada oıyndarynyń qatysýshylary men júldegerleri qatysty. Tańǵy jattyǵý jumysy qalalyq ákimdiktiń «Fitness Park Astana» jobasymen birge ótti. Bul joba birneshe jyldan beri astanalyqtarǵa demalys kúnderin sátti ári densaýlyqqa paıdaly etip ótkizýge kómektesip keledi. Sondaı-aq, sporttyń ár túri boıynsha ótetin sheberlik saǵattary men kórsetilimder kishkentaı qatysýshylardyń erekshe nazaryn aýdardy.

«Sport - birlik, dostyq jáne damý ıdeologııasyn nasıhattaıtyn basty quraldardyń biri. Sol sebepti, elimizde mundaı sporttyq sharalar dástúrli túrde ótip, halyqtyń qyzyǵýshylyǵyn arttyrǵanyna qýanyshtymyn. Bul kún bizder, olımpıadashylar úshin erekshe qýanyshty kún. Mereke kezinde dostarymyzben jáne jankúıerlerimizben kezdesip, bir marqaıyp qalamyz. Biz úshin Olımpızm degen ne? Olımpızm - aqyl men deneniń jáne erkindiktiń tepe-teńdigin saqtap, biriktiretin ómir fılosofııasy. Sport pen mádenıetti jáne bilimdi biriktiretin Olımpızm salaýatty ómir saltyn ustanýǵa, adamı qundylyqtardy joǵary qoıýǵa, jalpyǵa ortaq etıkalyq qaǵıdalardy saqtaýǵa úndeıdi. Men barshańyzdy keremet merekemen quttyqtaı otyryp, bizdiń olımpıadalyq otbasymyz úlkeıe bersin degen tilek aıtamyn», - deıdi búginde kúres túrleri boıynsha qazaqstandyq federatsııanyń vıtse-prezıdenti qyzmetin abyroımen atqaryp otyrǵan Gýzel Manıýrova.

Sporttyq dástúrler Almatyda da umyt qalǵan joq. Almatylyqtar burynǵy dástúrden jańylmaı, Olımpıada kúnin velojaryspen atap ótti. Jarys «Nurly Taý» bıznes ortalyǵynda bastaldy. Sondaı-aq, velojarysqa qazaqstandyq sportshylar da qatysty. 23 maýsym kúni «ıA s toboı» balalarǵa pallıatıvtik kómek kórsetý Ortalyǵy Qazaqstan UOK qoldaýymen Olımpıada kúnin toılaý aıasynda onkologııalyq dertke shaldyqqan balalardyń qatysýymen «Jas kóshpendiler» oıynyn ótkizdi.

23-24 maýsym kúnderi Qazaqstannyń ózge de oblystarynda Halyqaralyq Olımpıada kúnine arnalǵan sporttyq-buqaralyq sharalar ótti. Bul merekeni álem halqy eki kún boıy #UnitedBy uranymen ótkizgen bolatyn. Qazaqstan halqyn da osy eki kún boıy sport biriktirdi. Olımpıada kúnin toılaýǵa qatysýshylar arnaıy sertıfıkatqa jáne elimizdiń Ulttyq Olımpıadalyq komıteti usynǵan júldeler men syılyqtarǵa ıe boldy.

Esterińizge sala keteıik, Halyqaralyq Olımpıada komıteti 1948 jyldyń qańtarynda Sankt-Morıtse qalasynda ótken HOK-tiń 42-shi sessııasy kezinde 23 maýsym kúni Halyqaralyq Olımpıada kúnin atap ótý týraly sheshim qabyldady. Bul kún arnaıy tańdap alyndy. Sebebi, 1984 jyldyń 23 maýsymy kúni olımpıadalyq qozǵalystyń qaıta jandanýyna ólsheýsiz úles qosqan Baron Per de Kýberten halyqaralyq atletıkalyq kongress aldynda óziniń tarıhı baıandamasyn oqyǵan edi. Kongress 1896 jyly Grekııada birinshi Olımpıada ótkizý týraly sheshim qabyldaǵan soń, sol kezde qurylǵan HOK-ti Kýberten ózi basqardy.