Qazaqstandyqtar endi Andorraǵa vızasyz bara alady
18:18, 15 Shilde 2022
NUR-SULTAN. QazAqparat – Qazaqstandyq týrıster endi Andorra Knıazdigine 90 kúnge vızasyz bara alady. Bul týraly Úkimet qaýlysy «Ashyq» NQA saıtynda jarııalandy, dep habarlaıdy QazAqparat tilshisi.
«Jaramdy jol júrý qujattary bar QR azamatynan Andorra Knıazdigine 90 kúnnen aspaıtyn ýaqytqa bir nemese birneshe ret barǵanda, tranzıtpen ótkende jáne ýaqytsha bolǵan kezde olardan vızalyq talaptar suralmaıdy. Andorra Knıazdiginiń aýmaǵynda bolǵan kezinde óziniń qujattaryn joǵaltqan Qazaqstan Respýblıkasynyń azamaty sol eldegi Qazaqstan elshiligine nemese konsýldyq bólimshelerine baryp, ókildikter usynǵan ýaqytsha qujat arqyly Andorra aýmaǵynan tys jerlerge shyǵa alady», - delingen qaýlyda .
Eske sala keteıik, taıaýda Qazaqstan men Nıkaragýa arasyndaǵy vızalyq talaptar alynyp tastalǵanyn habarlaǵan bolatynbyz.