Qazaqstandyqtar dúkender men bazarlarda 6 trln teńgeden astam aqsha jumsady
Ranking.kz portalynyń málimetinshe, birinshi jartyjyldyqtyń qorytyndysynda bólshek saýda kólemi 6,1 trln teńgege jetti. Bul bir jyl burynǵy aqshalaı mándegi kórsetkishten 13,8 paıyzǵa artyq.
Azyq-túlik taýarlarynyń bólshek saýdasy bir jylda 7,9 paıyzǵa ósip, 2 trln teńgege jetti. Al azyq-túlikke jatpaıtyn taýarlar 17 paıyzǵa artyp, 4,1 trln teńgeni qurady.
Saýda kásiporyndary men uıymdary 4,3 trıllıon teńgeniń, jeke kásipkerler, onyń ishinde bazarlarda saýda jasaıtyndar 1,8 trıllıon teńgeniń taýaryn satty.
Óńirler boıynsha bólshek saýda taýarlarynyń basym bóligi ádettegideı Almatyǵa tıesili jáne respýblıkadaǵy kórsetkishtiń 30,7 paıyzyn qurap otyr. Aqshamen eseptegendegi kólemi bir jylda 10,7 paıyzǵa ósip, 1,9 trln teńgege jetti. Elorda ekinshi orynda tur. Astanada saýda-sattyq 16,8 paıyzǵa ulǵaıyp, 711,2 mlrd teńgeni qurady. Úshinshi orynda turǵan Qaraǵandy oblysynda bólshek saýda 5,5 paıyzǵa ósip, 506,7 mlrd teńge boldy. Resmı bólshek saýdanyń eń az kólemi jańadan qurylǵan Ulytaý oblysynda tirkeldi, nebári 39 mlrd teńge.