Qazaqstandyqtar Dımash pen Danelııa úshin Twitter-de daýys bere alady

ASTANA. QazAqparat - Amerıkadaǵy The World's Best talanttar baıqaýy qazylar alqasynyń qazaqstandyq múshesi Gaýhar Nurtas óziniń Instagram akkaýntynda Qazaqstan turǵyndarynyń Dımash Qudaıbergenniń án aıtqanyn qashan jáne qaı jerden kórýge bolatyny, sondaı-aq baıqaýda ol úshin qalaı daýys bere alatyny jaıynda jazdy. Bul týraly QazAqparat tilshisi habarlaıdy.

«Sársenbi, 6 aqpan, Los-Andjeles ýaqytymen saǵat 20:00-de The World's Best talanttar baıqaýynyń ekinshi epızody bastalady. AQSh-tan tys eldegi jankúıerler, Instagram jáne You tube-ta meniń live kórsetilimime qosylyńyzdar», - dep jazdy Gaýhar Nurtas.

Budan basqa, ol epızodtyń súıiktisi úshin @theworldsbestcbs-tyń Twitter-degi resmı paraqshasynda onlaın arqyly daýys berýge bolatynyn habarlady.

Eske sala keteıik, Qazaqstannyń atynan bul baıqaýǵa eki oryndaýshy - Dımash Qudaıbergen men Danelııa Tóleshova qatysyp otyr. 1 mıllıon dollar kólemindegi syıaqy jáne «Álemniń úzdigi» ataǵy úshin álemniń úzdik qatysýshylary dodaǵa túsedi.

Budan bólek, QR Mádenıet jáne sport mınıstri Arystanbek Muhamedıulynyń málimetinshe, qazirgi kezde Dımash Qudaıbergenniń AQSh-ta jeke kontsertin ótkizý máselesi boıynsha kelissózder júrgizilýde.

«Qazirgi jobamyz - Dımashtyń Amerıkada jeke kontsertin uıymdastyryp berý. Biraq biz onyń burynnan da úlken shoý bolǵanyn, onyń Nıý-Iorktyń úlken zalynda, múmkin, «Medıson-skver-gardenda» ótkenin qalaımyz», - dedi Arystanbek Muhamedıuly.

Avtor: Kamıla Ámirova