Qazaqstandyqtar depozıt ashyp, balasyn ýnıversıtette oqytýǵa aqsha jınaı alady

ALMATY. QazAqparat- Qazaqstandyqtar memlekettik bilim berý jınaqtaý júıesi aıasynda 21 myńnan astam bilim depozıtin ashty. Bul týraly Almaty qalasynyń óńirlik kommýnıkatsııalar qyzmetiniń baspasóz konferentsııasy barysynda QR BǴM «Qarjy ortalyǵy» AQ ilgeriletý jáne syrtqy kommýnıkatsııalar departamentiniń dırektory Alpamys Satybaldın málim etti.

Eske salsaq, 2013 jyldan bastap el turǵyndary ózderiniń bilim alýyna nemese balalarynyń bilim alýyna aqshalaı qarajat jınaı alady.

Bul úshin AQYL bilim berý jınaqtaý salymy quryldy.

«Onyń basty artyqshylyǵy – banktik syıaqydan basqa 9%-ǵa deıin salymdarǵa memlekettik syılyqaqy esepteledi. Memleket syılyqaqysynyń mólsheri – jyldyq 5%, áleýmettik osal halyq sanaty úshin – 7%. Depozıttiń qatań nysanaly maqsaty bar: jınaqtalǵan qarajat QR-da da, shetelde de oqý aqysyn tóleýge paıdalanylýy tıis. Salymshy balanyń atyna nemese qatysýshy bankte ózine bilim berý salymyn ashady, jınaqtaýdyń yqtımal merzimin, jınaqtaýdyń boljamdy somasyn jáne jarnalardyń kezeńdiligin derbes aıqyndaıdy», - dep túsindirdi A. Satybaldın.

Qazirgi ýaqytta bilim berý depozıtin ashýǵa bolatyn qatysýshy bankter: «Qazaqstan halyq banki» AQ, syıaqy mólsherlemesi – 9%; «Jysan Bank» AQ, syıaqy mólsherlemesi – 8,3%; «Bank VTB» AQ EU, syıaqy mólsherlemesi – 8,8%; «Nurbank» AQ, syıaqy mólsherlemesi – 9%.

JOO-ǵa nemese kolledjge aqyly negizde túskennen keıin salymshy depozıt ashylǵan bankke JOO/kolledjben shart usynady, bank oqý aqysyn salymshynyń shotynan tikeleı bilim berý uıymyna aýdarady.

Eger oqýdyń barlyq merzimin tólegennen keıin depozıtte qarajat qalsa, salymshy olardy alyp tastaýǵa quqyly.

Bala grantqa túsken jaǵdaıda salymshy barlyq qarajatty bank syıaqysymen jáne memleket syılyqaqysymen birge alýǵa nemese olardy magıstratýraǵa tóleýge jumsaýǵa quqyly.