Qazaqstandyqtar bıyl otandyq avtokólik satyp alýǵa 454,3 mlrd teńge jumsady
«QazAvtoÓnerkásip» Qazaqstannyń avtomobıl salasy kásiporyndarynyń odaǵy taratqan málimetke sáıkes, jeńil, júk, avtobýs tehnıkalaryn, arnaýly mashınalar men tirkemelerdi qosa alǵanda jalpy quny 528,1 mlrd teńge bolatyn 69 687 avtokólik qurastyryldy. Naqty mánde shyǵarylǵan ónim kólemi ótken jylǵy kórsetkishten 53,9 paıyzǵa asyp tústi. Jeńil avtomobıl qurastyrý 47,9 paıyzǵa artyp, 58 547 kólikke jetti. Avtobýs tehnıkasyn qurastyrý da 66 paıyzǵa artyp, 1 614 birlikti qurady. 7 217 júk kóligi qurastyrylyp, ósim 1,9 ese boldy. Sonymen qatar 330 arnaýly avtotehnıka men 1 979 tirkeme shyǵaryldy.
2020 jyldyń tek qarasha aıynda qazaqstandyq kásiporyndardyń konveıerinen 7 891 avtokólik shyǵaryldy. Bul 2019 jylǵy kórsetkishten 25,8 paıyzǵa joǵary bolǵanymen, qazan aıyndaǵy kórsetkishten 29,2 paıyzǵa tómen bolyp otyr.
Jyl basynan beri otandyq avtozaýyttarda qurastyrylǵan 59 743 kólik satyldy. Bul ótken jylǵy kórsetkishten (39 460) 51,4 paıyzǵa joǵary. 2020 jyldyń 11 aıynda otandyq kásiporyndardyń naryqtaǵy úlesi 72,5 paıyzǵa deıin artty.
Respýblıka turǵyndarynyń jergilikti óndiriste qurastyrylǵan kólikterdi satyp alýǵa jumsaǵan shyǵyndary 454,3 mlrd teńgege jetip, ótken jylǵy kórsetkishten 67,3 paıyzǵa asyp tústi.
Qazaqstanda qurastyrylǵan jeńil avtomobılderdiń ishinde esepti kezeńde suranysy joǵary bolǵan 5 brendke myna kólikter kirip otyr: Lada (16 262), Hyundai (15 621), Chevrolet (7 499), Ravon (5 866) jáne KIA (5 098). Sonymen qatar otandyq kásiporyndar usynatyn kólik túrleriniń qataryn JAC (1 816), UAZ (601) jáne Skoda (257) kiredi. Jergilikti óndiris oshaqtarynda qurastyrylǵan kólikterdiń satylym reıtıngin Lada Granta (7 240) bastap, odan keıingi oryndarǵa Ravon Nexia R3 (5 866), Hyundai Accent (4 425), Hyundai Tucson (4 319) jáne Lada Vesta (3 730) jaıǵasqan.
Sonymen qatar qazaqstandyq tanymal kólik túrleri qataryn Chevrolet Cobalt (3 545), Lada 4x4 (3 001), Hyundai Creta (2 930), KIA Rio (2 687) jáne Chevrolet Nexia (2 144) tolyqtyryp otyr.
2020 jyldyń qańtar-qarashasynda jeńildetilgen avtonesıe memlekettik baǵdarlamasyna qatysýshylar 7 840 avtomobıl satyp aldy. Osy jyldyń 11 aıynda qazaqstandyqtar 28 133 tehnıkany ýtılızatsııaǵa ótkizdi. Júrgizýge jaramsyz kólik quraldaryn ýtılızatsııalaý baǵdarlamasynyń ekinshi kezeńi aıasynda jańa avtomobıl satylp alý úshin 8 684 jeńildik sertıfıkaty berildi. Elimizdiń avtosalondarynda mundaı 10 957 sertıfıkat paıdalanyp, qazaqstandyqtar otandyq óndiristen shyqqan 5 715 kólik satyp aldy.