Qazaqstandyqtar biryńǵaı baılanys ortalyǵyna qandaı máselemen jıi habarlasady

NUR-SULTAN. QazAqparat -Ótken jyly sáýirde 1414 biryńǵaı baılanys ortalyǵy «Azamattarǵa arnalǵan úkimet» memlekettik korporatsııasyna aýysty. Sol sátten bastap búginge deıin qazaqstandyqtardyń 28 mıllıon ótinishi esepke alyndy, dep habarlaıdy QazAqparat.

Osy ýaqyt aralyǵynda kórsetilgen qyzmet deńgeıi boıynsha klıentterdiń qanaǵattaný deńgeıi 4,72 ballǵa deıin kóterildi.

Ótken jyldyń sáýirinen bastap klıentterdiń eń tanymal suranysy – tólqujattar men jeke kýálikter berý. Osy baǵyt boıynsha 1,5 mıllıonǵa jýyq ótinish tústi.

Ary qaraı júrgizýshi kýáligin alý (523 824) jáne bala týý boıynsha járdemaqy taǵaıyndaý (501 481) máselesi kósh bastap tur.

Sonymen qatar, TOP-10-ǵa turǵylyqty mekenjaı boıynsha tirkeý, ETsQ alý, aty-jónin aýystyrý, nekeni tirkeý jáne salyq tóleý máseleleri kiredi.

Biryńǵaı baılanys ortalyǵy 1323 memlekettik qyzmet jáne 243 basqa qyzmet boıynsha keńes beredi (eGov portalynyń servısteri, elicense.kz).

Odan bólek, 10 aqparattyq-kommýnıkatsııalyq qyzmet boıynsha jaýap alýǵa bolady.

Sonymen qatar, operatorlar ekpege qatysty suraqtar, Ashyq qosymshasy, E-otinish júıesi jáne HQKO qyzmeti týraly aqparat usynady.

Baılanys ortalyǵy ótinishterdi 1414 telefony arqyly ǵana emes, memlekettik korporatsııanyń resmı saıty (gov4c.kz), áleýmettik jelilerdegi resmı akkaýnty, sondaı-aq eGov portaly arqyly da qabyldaıdy.