Qazaqstandyqtar Beıjińde merekelik sherýge qatysty

BEIJІŃ. QazAqparat - 9 mamyrda qazaqstandyqtar Beıjińdegi «Chaoıan» ortalyq saıabaǵynda «Jaýyngerlik polk» sapymen júrip ótti, dep habarlaıdy Qytaıdaǵy «QazAqparat» HAA menshikti tilshisi. 

«Jaýyngerlik polk» tizbeginiń quramynda 400-den astam adam boldy. Olar soǵys jáne tyl ardagerleriniń sýretterin alyp júrdi. Keıin is-sharaǵa qatysýshylar aspanǵa raýshan gúliniń japyraǵynan otshashý jiberdi.

Beıjińdegi «Jaýyngerlik polk» sherýine Reseı, Qytaı, Qazaqstan, Qyrǵyzstan, Tájikstan jáne basqa da elderdiń azamattary qatysty.



15 jastaǵy Ramazan Sársenniń babalary Mákenov Seraly men Jaqsymbek Ýnchıbaev maıdanǵa attanyp, Otan úshin jaýǵa qarsy soǵysqan.

Onyń naǵashy atasynyń ákesi Tursyn Balapanov (1914-1978) - «Eńbek ardageri» bolǵan. Ekinshi dúnıejúzilik soǵys jyldarynda Qyzylorda oblysy Jalaǵash aýdany Alamesek kentinde brıgadır, sheberhana meńgerýshisi jáne mehanık bolyp jumys istegen. Keıin Syrdarııa aýdany Aqjarma kentinde kúrish ósirýmen aınalysqan.

«Babam beıbit ýaqytta batyrlyq jasady. Traktor Syrdarııadaǵy muzdyń astyna ketkende, oǵan arqan baılap shyǵarǵan. Syrdarııadaǵy muzdyń astynda 20 mınýt boıy bolǵan», - dedi QazAqparatqa bergen suhbatynda R. Sársen.

T. Balapanovtyń ómiri men batyrlyǵy Asqar Toqmaǵambetovtiń «Muzbalaq» poemasynda sıpattalǵan.