Qazaqstandyqtar bankterge qansha qaryz

ASTANA. QazAqparat - Qazaqstandyqtar ekinshi deńgeıli bankterge 3,7 trln teńge qaryz. Bul jaıynda búgin «Qazaqstan Respýblıkasy azamattarynyń tólemge qabilettiligin qalpyna keltirý týraly» zań jobasyn talqylaý barysynda QR Ulttyq banki qarjylyq qyzmetterdi tutynýshylardyń quqyǵyn qorǵaý basqarmasy bastyǵynyń orynbasary Iman Ál-Keısı málim etti, dep habarlaıdy QazAqparat.

«2017 jyldyń 1 sáýirinde jeke tulǵalarmen jasalǵan 5 383000 banktik zaım kelisimsharttar boldy. Olar boıynsha qaldyq borysh 3,7 trln teńgeden asyp jyǵylady. Onyń ishinde 1,5 trln teńgeden astam somaǵa shamamen 338 myń kelisimshartqa jyljymaıtyn múlik túrinde kepil qoıylǵan», - dedi ol.

Onyń dereginshe, tólem merzimi 90 kúnnen asyp ketken 464521 banktik zaım kelisimsharty bar. Olardyń qaldyq boryshy 442,7 mlrd teńgeni quraıdy.  Al onyń ishinde somasy 224,5 mlrd teńgeni quraıtyn 3319 banktik zaım kelisimshartyna jyljymaıtyn múlik kepilde tur.

«Bul ulttyq banktegi aldyn ala málimetter», - dep naqtylady Iman Ál-Keısı.