Qazaqstandyqtar bankterden 175 kg altyn satyp alǵan - Danııar Aqyshev
«2017 jyly mamyrda Ulttyq bank halyq arasynda altyn quımasyn satý baǵdarlamasyn bastaǵan bolatyn. Onyń aıasynda 10,20,50,100 grammdyq quımalar satylymǵa shyǵaryldy. Búginde ekinshi deńgeıli bankter jalpy salmaǵy 175 keli bolatyn altyn satty. Bir jyldan asa ýaqyt ishinde biz josparlanǵan altynnyń barlyǵyn derlik sattyq. Sebebi, biz baǵdarlamanyń basynda 180 keli altyndy targetteımiz dep boljaǵan edik», - dedi Danııar Aqyshev.
Onyń aıtýynsha, altyn saýdasynyń kólemin ulǵaıtý josparlanyp otyr.
Odan bólek, Ádilet mınıstrliginde tirkelgen soń altyndy aıyrbastaý pýnktileri de sata alady.
Sonymen qatar, QR Ulttyq banki salmaǵy 12-13 keli bolatyn altyn quımalardy satyp alý múmkindigin qarastyryp jatyr.
«Biraq ony ekiniń biri satyp ala almaıdy. Óıtkeni, altyn quımalary óte úlken, salmaqty. Sondyqtan, jappaı eldiń bári osy operatsııany paıdalanady dep aıta almaımyn», - dedi Ulttyq bank basshysy.