Qazaqstandyqtar áýejaıda tsıfrlyq jeke kýálikti paıdalana alady
«Túrkistan qalasynyń áýejaıynda jeke derekterdi rastaý úshin endi «e-Gov Mobile« qosymshasy arqyly tsıfrlyq jeke kýálikti kórsetýge bolady. Buǵan deıin mundaı qyzmet Nur-Sultan, Almaty, Aqtóbe jáne Shymkent qalalarynyń áýejaılarynda qoljetimdi bolatyn. Áýejaıda tsıfrlyq jeke kýálikti paıdalaný úshin «e-Gov mobile« júıesinde tirkelgen paıdalanýshy «Tsıfrlyq qujattar« servısine kirip, tizimnen jeke kýálikti tańdaýy qajet. Áýejaıdyń tirkeý bóliminde, sondaı-aq ushar aldyndaǵy tekserýden óterde QR-kody bar smartfonnyń ekranyn kórsetý kerek», - dep atap ótedi vedomstvodan.
Mınıstrlik málimetinshe, tsıfrlyq qujattar qyzmeti ilki rejımde jumys isteıdi jáne ázirge Nur-Sultan, Almaty, Aqtóbe, Shymkent jáne Túrkistan qalalary arasynda qoljetimdi. Osy áýejaılardyń qyzmetin paıdalanýdy josparlap otyrǵan jolaýshylarǵa ózimen birge jeke kýáliginiń túpnusqasyn da alyp júrgeni jón.
Aıta keteıik, ishki reısterde tsıfrlyq jeke kýálikti paıdalaný múmkindigi QR Indýstrııa jáne ınfraqurylymdyq damý mınıstrliginiń, QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń, «Qazaqstannyń avıatsııalyq ákimshiligi» AQ-nyń, otandyq áýe kompanııalary men áýejaılarynyń jáne «Ulttyq aqparattyq tehnologııalar»AQ-nyń júıelerdi ıntegratsııalaý boıynsha birlese atqarǵan jumystarynyń nátıjesinde iske asyryldy.