Qazaqstandyqtar aty-jónin ınternet arqyly ózgerte alady

ASTANA. 11 aqpan. QazAqparat - «Elektrondyq úkimettiń» ınternet-portalynda «Nekege turý nemese buzylýyna baılanysty aty-jón ózgerisin tirkeýge elektrondyq ótinish berý» jańa qyzmeti paıda boldy.

Bul týraly jumysty uıymdastyrý jáne azamattardyń hal-aktilerin tirkeý bólimine silteme jasap, Astana qalasy Ádilet departamentiniń baspasóz qyzmeti málimdeıdi.

Mundaı qyzmet tek elektrondy sandyq qoltańbasy (ESQ) barlarǵa ǵana kórsetiledi. Al ESQ-ny www.egov.kz portalynan nemese Halyqqa qyzmet kórsetý ortalyqtarynan alýǵa bolady. Aty-jóndi ózgertý týraly elektrondyq ótinish berý úshin portalda tirkelip, ótinishti (júıege málimetterdi engizip, ótinishke ESQ kómegimen qol qoıý) toltyrý jetkilikti.

Kórsetilgen qyzmet úshin memlekettik baj salyǵyn tóleý elektrondyq úkimettiń avtomattandyrylǵan tólem shlıýzi arqyly júzege asyrylady.