Qazaqstandyqtar alaıaqtardyń kesirinen 15 mlrd teńgesinen aıyrylǵan

ASTANA. QazAqparat – Bıyl azamattardyń aqshasyn aldaý jolymen zańsyz ıemdenýge qatysty 17,5 myń qylmys tirkeldi. Bul týraly QR Іshki ister mınıstrligi Kıberqylmysqa qarsy kúres ortalyǵy bastyǵynyń orynbasary Rústem Dúısetaev aıtty, dep habarlaıdy QazAqparat tilshisi.

«Qazirgi tańda azamattardyń aqshasyn aldaý jolymen zańsyz ıemdený qylmystardyń eń kóp taraǵan túri sanalady. Sondyqtan, alaıaqtyqtarǵa qarsy is-qımyl elimizde jáne búkil álemde oryn alyp otyrǵan ózekti máselelerdiń biri retinde qalyp otyr», - dedi ol ІІM baspasóz qyzmeti alańynda ótken brıfıngte.

Onyń atap ótýinshe, alaıaqtar azamattardy aldaý úshin ár túrli amal qoldanady. Sol sebepten mundaı qylmystardyń sany jyldan jylǵa kóbeıip keledi.

«Jyl basynan beri 17,5 myń qylmys tirkeldi. Degenmen, ótken jyly 17 900 qylmysty quraǵan kórsetkishten tómen. Alaıaqtardyń is-áreketi saldarynan jyl basynan beri azamattarǵa 15 mlrd teńge shyǵyn keltirildi», - dedi Rústem Dúısetaev.

Ortalyǵy bastyǵy orynbasarynyń dereginshe, 6 aıdyń ishinde onlaın-saýdaǵa qatysty 6 myńǵa jýyq alaıaqtyq jasalǵan.

Sonymen qatar bankter men mıkrokredıt uıymdarynda jalǵan onlaın-zaım rásimdeýdiń 2,8 faktisi tirkelgen.