Qazaqstandyqtar 30 kún kútpeı elge orala ala ma – UQK jaýaby

NUR-SULTAN. QazAqparat – QR UQK Shekaralyq qyzmeti qazaqstandyqtardyń 30 kúndik merzimdi kútpeı elge orala alatynyn jarııa etti, dep habarlaıdy QazAqparat tilshisi.

«Qazaqstan Respýblıkasynyń azamattary memlekettik shekara arqyly kez kelgen baqylaý-ótkizý beketi arqyly elge orala alady. Al shetel azamattary úshin Qazaqstanǵa kirý jaǵynan shekteý bar. Bul shekteýler epıdemıologııalyq ahýalǵa baılanysty engizilgen», - dep túsindirdi podpolkovnık Ámire Mulýashev.

Qazaqstan Respýblıkasy Ulttyq qaýipsizdik komıtetiniń Shekara qyzmeti azamattarǵa pandemııa kezinde shekaradan ótý erejelerin túsindirdi. Osylaısha, Qazaqstan Respýblıkasynyń azamattary kez-kelgen maqsattaǵy saparmen Qazaqstannan 30 kúnde bir ret shetelge kete alady. Elden shyǵý kezinde jıilik anyqtalady. Elge oralǵannan keıin kelesi sapar Qazaqstan Respýblıkasyna kelgen kúnnen bastap 30 kún ótken soń ǵana múmkin bolady.

Buǵan deıin onlaın rejımde ótken baspasóz máslıhatynda Densaýlyq saqtaý mınıstri vedomstvoaralyq komıssııada 2 aqpanda Qazaqstan Respýblıkasynyń memlekettik shekarasynan ótý tártibine ózgerister engizgenin málimdegen bolatyn.