Qazaqstandyqtar 19 mlrd teńge kólik salyǵyn tóledi

NUR-SULTAN. QazAqparat - 2021 jylǵy 1 qańtardan bastap 1 sáýirdi qosa alǵandaǵy kezeńde jeke tulǵalardyń kólik quraldaryna salynatyn salyq boıynsha bıýdjetke 19,7 mlrd teńge tústi. Aǵymdaǵy jylǵy 25 naýryzdaǵy jaǵdaı boıynsha osyǵan deıin 6,6 mlrd teńge tússe, aldaǵy tólemder týraly push-habarlama jibergennen keıin 13,1 mlrd teńge túsken. Mundaı statıstıkany QR QM Memlekettik kirister komıteti jarııalady.

Sondaı-aq, MKK-de: «Salyq kodeksine engizilgen ózgeristerge sáıkes 2020 jylǵa kólik quraldaryna salynatyn salyqty jeke tulǵalar 2021 jylǵy 1 sáýirden keshiktirmeı tóleýi qajet bolatyn»,- dedi.

2 sáýirden bastap árbir keshiktirilgen kún úshin ósimpul esepteledi.

Osyǵan deıin, a.j. 30 naýryzynda https://t.me/kgdmfrk Telegram arnasynda kólik salyǵy boıynsha saýalnama júrgizgen. «Siz 2020 jylǵa arnalǵan kólik quraldary salyqtyń tólenýge tıisti aldaǵy somasyn qalaı bildińiz?»,- degen suraqqa saýalnamaǵa qatysýshylar kelesideı jaýap bergen:

- saýalnamaǵa qatysqandardyń 36%-i salyq somasyn «e-Salyq Azamat» mobıldi qosymshasy arqyly bilgen;

- 30%-i banktiń mobıldi qosymshasy arqyly;

- 5%-i «e-Salyq Azamat» mobıldi qosymshasyndaǵy Kalkýlıatordyń kómegimen ózderi derbes eseptegen;

- 21% respondentter Memlekettik kirister komıtetiniń portalyndaǵy Kalkýlıatordyń kómegimen óz betinshe eseptegen;

- 8%-i Memlekettik kirister basqarmasyna baryp, keńes alýdy jón kórdi.

Eske sala keteıik, budan buryn Memlekettik kirister komıteti kólik salyǵy boıynsha aldaǵy tólemderdi alǵash ret tóleý merzimine deıin «e-Salyq Azamat» tegin mobıldi qosymshasyna jiberetinin málimdegen.

2020 jylǵa jeke tulǵalardyń kólik quraldaryna salynatyn salyq ІІM Ákimshilik polıtsııa komıtetiniń málimetteri negizinde eseptelgen.