Qazaqstandyqtar 1 qazanǵa deıin salyq tólemese, 20 myń teńge aıyppul salynady degen aqparat – jalǵan
«Sońǵy ýaqytta áleýmettik jeliler men messendjerler arqyly ótken salyqtyq kezeńder úshin bereshegi bar azamattar boryshyn 1 qazanǵa deıin ótemegen jaǵdaıda 8 AEK (20000 teńge shamasynda) kólemindegi aıyppul esepteletini týraly habarlama taratylýda. Bul aqparat shyndyqqa janaspaıtynyn resmı túrde habarlaımyz», dedi QR Qarjy mınıstrliginiń baspasóz hatshysy Álibek Abdılov.
Resmı ókildiń aıtýynsha, jeke tulǵalar bıýdjetke jer jáne múlik salyqtaryn ótken jyl úshin aǵymdaǵy jyldyń 1 qazanyna deıin tóleýi tıis. Kólik salyǵy aǵymdaǵy jyl úshin 31 jeltoqsanǵa deıin óteledi.
«Qoldanystaǵy QR Salyq zańnamasynda aıyppul esepteý sharalary kórsetilmegen. Tek salyqty ýaqytyly tólemegen jaǵdaıda ótkizilgen ár kúnge ósimpul esepteledi», - dedi Á.Abdılov.
Sondaı-aq, aǵymdaǵy jyldyń aıaǵyna deıin jeke tulǵalarǵa arnalǵan salyqtyq raqymshylyq úrdisi júrýde. Onyń erejelerine sáıkes, jeke tulǵa beresheginiń negizgi somasyn ótegen jaǵdaıda ósimpul avtomatty túrde esepten shyǵarylady.