Qazaqstandyq ziltemirshi Beıjiń Olımpıadasynyń altyn medalin aldy

NUR-SULTAN. QazAqparat –Búgin «Altyn Samǵaý-2019» Ulttyq sporttyq júldesiniń saltanatty rásiminde qazaqstandyq sportshylarǵa 2008 jylǵy Beıjiń Olımpıadasynyń júldeleri tabystaldy dep habarlaıdy QazAqparat tilshisi

Qazaqstan Ulttyq Olımpıadalyq komıtetiniń prezıdenti Tımýr Qulybaev Halyqaralyq Olımpıada komıtetiniń atynan Alla Vajenına men Olga Rypakovaǵa 2008 jylǵy Beıjiń Olımpıadasynyń medaldaryn tapsyrdy.

«Araǵa 10 jyl salyp Olımpıada jeńimpazy ataný kútpegen jaǵdaı. Shynymdy aıtsam, meniń kúmis júlde altynnan da artyq boldy. Sebebi bul jeńis jolynda biz jattyqtyrýshym ekeýmiz kóp ter tóktik. Eger men altyn medaldy sol kezde utyp alǵanymda múmkin basqa sezimde bolar ma edim. Óıtkeni, men Qytaıdyń eń úzdik sportshysy Tsao Leımen básekege tústim. Men Olımpıadaǵa deıin Japonııada ótken Azııa chempıonatynda oǵan jol bergenmin. Tek ókinishtisi, Qazaqstan ánuranynyń oryndalmaı qalǵany», - dedi ziltemirshi Alla Vajenına.

Aıta ketelik, 2008 jylǵy Olımpıada oıyndarynyń nátıjeleri qaıta qaralyp, aýyr atletıka men jeńil atletıkadaǵy Qazaqstan kórsetkishterinde ózgerister oryn aldy. Qazaqstandyq ziltemirshi Alla Vajenına 75 keli salmaqta 2008 jylǵy Olımpıada oıyndarynyń altyn júldegeri atandy.

Al Olga Rypakova óz týǵan kúninde úsh qarǵyp sekirýden Beıjiń Olımpıadasynyń kúmis júldesin resmı túrde ıelendi.