Qazaqstandyq juptar donor retinde týystarynyń jynystyq jasýshasyn paıdalanýdy qalaıdy
«1995 jyldan bastap Qazaqstanda 85 000-ǵa jýyq erli-zaıypty qosalqy reprodýktıvtik tehnologııalar ádisterimen emdeldi. Qazirgi ýaqytta elde 27 ekstrakorporaldyq uryqtandyrý (budan ári - EKU) ortalyǵy jumys isteıdi. Osy EKU baǵdarlamasyn oryndaıtyn medıtsına ortalyqtarynda jeke donorlar bazasy bar. Bir medıtsına ortalyǵyndaǵy donorlar bazasyna tirkelgen jynystyq jasýsha donory, ekinshi medıtsına ortalyǵynyń bazasyna tirkelýge quqyǵy joq. Qazirgi tańda ortalyqtandyrylǵan donorlar bazasyn qurý týraly másele arnaıy mamandardyń arasynda talqylanyp, osy baǵytta qajetti is-sharalar júrgizý qolǵa alynýda», - delingen Úkimet basshysynyń orynbasarynyń jaýabynda.
Onyń jaýabynda, «Jynystyq jasýshalardyń, reprodýktıvtik aǵzalar tinderiniń donorlyǵyn júrgizý qaǵıdalary men sharttaryn bekitý týraly» Densaýlyq saqtaý mınıstri buıryǵynyń 1-taraýynda bir donordan 10 jynystyq jasýsha alynǵannan keıin azamat donorlar bazasynan shyǵarylatyndyǵy aıtylǵan.
«25 jyldyń ishinde EKU baǵdarlamasymen 24 000 náreste, sondaı-aq 100 jynystyq jasýsha donorynan 120 náreste dúnıege kelgen. Ol EKU-men dúnıege kelgen jalpy bala sanynyń 0,5 paıyzyn quraıdy. Sonymen qatar, elimizde bedeýligi bar juptardyń basym kópshiligi donorlyq EKU baǵdarlamasyn júrgizý úshin donor retinde týystarynyń jynystyq jasýshasyn paıdalanýdy qalaıdy», - degen Eraly Toǵjanov suraqqa jaýap berip.