Qazaqstandyq juldyzdar jańa ekologııalyq chellendj bastady

NUR-SULTAN. QazAqparat – Qazaqstandyq juldyzdar qoqys jınaý boıynsha «Qoqys qaldyrma!» ekologııalyq chellendjin bastady, dep habarlaıdy QazAqparat tilshisi.

Tanymal qazaqstandyq opera ánshisi Maıra Muhamedqyzy jáne telejúrgizýshi, bıznesvýmen Dınara Sátjan Sileti quzdaryna bardy jáne sol mańdaǵy qoqysty jınap, ózge qazaqstandyqtardy da tabıǵı demalys aımaqtaryndaǵy tazalyqqa shaqyrdy.

«Sileti quzdary Nur-Sultannan Ereımentaýǵa baratyn baǵytta ornalasqan. Onda Sileti ózeni bar, Qazaqstannyń eń taza jáne uzyn ózenderiniń biri. Dál osy ózenniń boıyndaǵy quzdarǵa órmeleý úshin baramyz. Jeke ózim eki jyldan beri quzǵa órmeleýmen aınalysamyn. Osy joly Maıra Muhamedqyzyn shaqyrdyq, ol alǵash ret quzǵa órmelep, jartas basynda án saldy», - dedi Dınara Sátjan QazAqparat tilshisine bergen suhbatynda.

Sonymen birge, olar «Qoqys qaldyrma!» chellendjin bastap, Sileti mańynan 20 qapqa jýyq qoqys jınaǵan.

«Siletige tek quzǵa órmeleý úshin emes, ózimizben birge qoqys qaptaryn da alyp shyqtyq. Óıtkeni ondaǵy jer óte las. Adamdar óz qoqysyn da jınamaıdy, qarbyz ákelip, qabyǵyn sol kúıi tastap ketedi. Jol biletin adam bolmasa, bul jerdi tabý óte qıyn. Shomylatyn jer de az bolǵandyqtan, kóp adam kele bermeıdi. Áıtse de, ózen mańynan 20 qapqa jýyq qoqys jınaldy. Sol úshin «Qoqys qaldyrma!» chellendjin jarııalaýdy uıǵardyq», - dedi Dınara Sátjan.

Aktsııaǵa Dınara Sátjan, Maıra Muhamedqyzy jáne ózge de quzǵa órmeleýshiler qatysqan.