Qazaqstandyq juldyzdar mamyrdaǵy mereke kúnderi live kontsertter ótkizedi
«Pandemııaǵa baılanysty búkil álem karantın rejımin saqtaýda, onyń ishinde Almaty qalasy da bar. Ońtústik astananyń turǵyndary ózderin oqshaýlap úıde otyr. Alaıda bul mádenı sharalarǵa kedergi emes»,– dep habarlady qalalyq ákimdik.
Qazaqstan halqynyń birligi kúnine oraı 1 mamyr kúni saǵat 20.30-da Youtube-tegi Almaty Creative arnasynyń tikeleı efırinde, sondaı-aq Almaty telearnasynda qazaqstandyq estrada juldyzdary Roza Rymbaeva, Tolqyn Zabırova, Parvız Nazarov jáne Álı Oqapovtyń qatysýymen live kontsert ótedi. Sondaı-aq, Marat Omarov, Renat Gaısın men Dınaıa, «Melomen» toby qatysatyn live kontsertter Youtube-tegi Almaty Creative arnasynda qoljetimdi.
Jeńistiń 75 jyldyǵyna oraı 9 mamyr kúni saǵat 19.00-de Youtube-tegi Almaty Creative arnasynyń tikeleı efırinde, sondaı-aq Almaty telearnasynda qazaqstandyq estrada juldyzdary Roza Rymbaeva, Naǵıma Esqalıeva, Nurlan Abdýllın, Tolqyn Zabırova, Mádına Sádýaqasovanyń qatysýymen live kontsert ótedi.