Qazaqstandyq JOO-nyń fılıaly Ombyda ashylýy múmkin

ASTANA. QazAqparat – Senatta «Qazaqstan men Reseı úkimetteri arasyndaǵy RF-te Qazaqstannyń joǵary ári joǵary oqý ornynan keıingi bilim berý uıymdarynyń fılıaldaryn jáne Qazaqstanda Reseıdiń joǵary bilim beretin uıymdarynyń fılıaldaryn qurý jáne olardyń jumys isteýi týraly kelisimdi ratıfıkatsııalaý týraly» Zańy qabyldandy, dep habarlaıdy QazAqparat tilshisi.

«Bul Kelisimniń negizgi maqsaty Qazaqstan men Reseı joǵary oqý oryndarynyń fılıaldaryn qurý jáne jumys isteý máselelerin retteýge baǵyttalǵan. Qujat aıasynda Qazaqstanda reseılik joǵary bilim berý uıymdarynyń fılıaldaryn ashý kezinde qazaqstandyq lıtsenzııany alý, fılıaldarda oqytý eki eldiń memlekettik tilderinde júrgizilýi máseleleleri qarastyrylǵan. Sonymen qatar, bilim berý baǵdarlamalary aıasynda fılıal ornalasqan eldiń memlekettik tili men tarıhy mindetti túrde oqytylady dep kelisildi. Memlekettik baqylaý jáne akkredıtteý rásimi Qazaqstan Respýblıkasynyń zańnamasyna sáıkes júzege asyrylady», - dedi QR Ǵylym jáne joǵary bilim vıtse-mınıstri Qýanysh Erǵalıev.

Onyń aıtýynsha, stýdentterge qazaqstandyq jáne reseılik bilim týraly qujattardyń berilýi eskerilgen. Kelisimdi iske asyrý teris áleýmettik-ekonomıkalyq jáne quqyqtyq saldarǵa ákep soqpaıdy, sondaı-aq memlekettik bıýdjetten qosymsha shyǵyndardy talap etpeıdi.

«Jalpy Qazaqstan Respýblıkasy men Reseı Federatsııasy arasynda bilim jáne ǵylym salasynda kópjyldyq tıimdi yntymaqtastyq ornatylǵanyn atap ótkim keledi. Joǵary bilim salasyndaǵy yntymaqtastyq aıasynda byltyr Almaty qalasynda «MIFI» ıAdrolyq ulttyq zertteý ýnıversıteti jáne Atyraý qalasynda I.M. Gýbkın atyndaǵy Reseı memlekettik munaı jáne gaz ýnıversıtetiniń fılıaldary ashyldy», - dedi vıtse-mınıstr.

Onyń sózine qaraǵanda, Qazaqstan Respýblıkasy men Reseı Federatsııasy arasyndaǵy Kelisim negizinde taraptar tepe-teń negizde joǵary oqý oryndarynyń fılıaldaryn ashýdy bekitti.

«Qazirgi kezde Reseı jaǵymen osy eldiń shekaralas aımaqtarynda, ıaǵnı Omby men Samaradaǵy joǵary oqý oryndarynyń biriniń bazasynda Ál-Farabı atyndaǵy QazUÝ fılıalyn ashý máselesi pysyqtalyp jatyr. Bul másele boıynsha Qazaqstannyń bastamasyn iske asyrý úshin osy Kelisimdi ratıfıkatsııalaý qajet», - dedi Qýanysh Erǵalıev.