Qazaqstandyq JOO-lar mamandardy reseılikterden kem daıarlap otyrǵan joq - Ahmet Iasaýı atyndaǵy HQTÝ prezıdenti

ASTANA. QazAqparat - Qazaqstandyq JOO-lar bilikti mamandardy reseılik oqý oryndarynan kem daıarlap otyrǵan joq. Bul týraly búgin Ortalyq kommýnıkatsııalar qyzmetindegi baspasóz máslıhatynda Ahmet Iasaýı atyndaǵy Halyqaralyq qazaq-túrik ýnıversıtetiniń prezıdenti Ýálıhan Ábdibekov málim etti.

«Qazaqstandaǵy joǵary oqý oryndary mamandardy reseılik ýnıversıtetterden kem daıarlag otyrǵan joq. Ekinshiden, bizdiń baǵdarlamalardyń sapasy kóp baǵyttar boıynsha reseılikten joǵary. Oqý baǵdarlamalaryn daıarlaýshylardyń biri bolǵandyqtan, men osyny senimmen aıta alamyn. Sondyqtan da qazaqstandyq túlekter básekelestikten qoryqpaıdy», - dedi fızıka-matematıka ǵylymdarynyń doktory, ÚIID memlekettik baǵdarlamasy úshin kadrlardy daıarlaý taqyrybynda ótken baspasóz máslıhatynda.

Onyń aıtýynsha, eger de EAEO aıasynda elimizdiń eńbek naryǵyna sheteldik mamandar kelse, bizdiń kadrlarda olarmen básekelestikke túsý múmkindigi týyndaıdy.

«Bul alań ashyq bolǵan edi, endi EAEO iske qosylǵannan keıin qoljetimdirek bola tústi. Sonymen birge osy úrdister aıasynda joǵary bilikti kadrlardy daıarlaý turǵysynda ózge memleketterdi qanshalyqty basyp ozǵanymyzdy naqty kóretin bolamyz», - dedi ǵalym.