Qazaqstandyq jolserikter ózbekstandyq áıeldi bosandyryp aldy

ASTANA. QazAqparat - Mańǵystaý-Almaty baǵdaryndaǵy №378 poıyzdyń jolserikteri ózbekstandyq Ferýza Ahmetovanyń bosanýyna kómektesti. Jas áıel júktiliktiń sońǵy aıynda Aqtaýdan Tashkentke bara jatqan. Bul jaıly «QazAqparat» HAA «Jolaýshylar tasymaly» AQ baspasóz qyzmetine silteme jasap habarlaıdy.

Poıyzda Ferýzany tolǵaq qysyp, jolserikter dereý tıisti sharalardy jasaýǵa kirisken. Sekseýil stansysyna jetkende medıtsınalyq mamandar da kelgen. Jolserikter kýpesinde dúnıege kelgen sábıge Denız esimi qoıyldy. Qazir Ferýza nárestesimen Araldaǵy perınataldyq ortalyqta, jaǵdaılary jaqsy. Endi erterek eline jetkisi keledi.

«Jolserikter kómektespegende balam men ózime ne bolaryn kóz aldyma elestete almaımyn. Olarǵa alǵys aıtyp ta úlgermedim. Búgin mine, osy sátti paıdalanyp, olarǵa analyq alǵysymdy jetkizgim keledi», - deıdi F. Ahmetova.

«Jolaýshylar tasymaly» AQ «Ońtústik» fılıalynyń dırektory Asqar Shúkirbekov poıyz bastyǵy Qobylandy Nysanbaevqa, jolserikter Nurlan Saparov pen Qalybek Ersaparǵa alǵys jarııalaıtynyn aıtty.

Atap óterligi, jolaýshylarǵa qıyndyq týǵan kezde alǵashqy medıtsınalyq kómek kórsetý jónindegi trenıngter poıyz brıgadalarymen turaqty ótkizilip turady.

Bul, temirjol kóliginde osy aıda bolǵan ekinshi oqıǵa. Jolserikterdiń kómegimen 7 naýryzda Arqalyq qalasynyń turǵyny Áselhan Amanbaeva «Astana-Arqalyq» poıyzynda uldy bolǵan edi.