Qazaqstandyq Jerdi qashyqtyqtan zondtaý spýtnıginiń Orbıtaǵa shyqqanyna 5 jyl boldy

NUR-SULTAN. QazAqparat - Búgin qazaqstandyq ǵarysh tarıhynda ataýly kún. Bes jyl buryn, ıaǵnı 2014 jyldyń 30 sáýirinde Kýrý ǵarysh aılaǵynan (Gvıana, Frantsııa) alǵashqy qazaqstandyq jerdi qashyqtyqtan zondtaý (JQZ) spýtnıgi - KazEOSat-1 ushyrylǵan bolatyn, dep habarlaıdy «QazAqparat» HAA tilshisi.

Spýtnık ushyrylǵan sátten bastap ǵaryshtan 678 129 túsirilim jasaldy (álem boıynsha jalpy aýmaǵy 271 251 815 sharshy km), dep habarlaıdy QR Tsıfrlyq damý, qorǵanys jáne aeroǵarysh ónerkásibi mınıstrliginiń baspasóz qyzmeti.

KazEOSat-1 Qazaqstannyń memlekettik qurylymdarynyń múddesi úshin, sondaı-aq, ózge elderge satý maqsatynda ǵaryshtan jer betin túsiredi.

Spýtnık kúnge sáıkes dep atalatyn orbıta boıynsha jyljıdy. ıAǵnı ǵarysh apparaty planetanyń bir polıýsinen ekinshisine ushady. KazEOSat-1 spýtnıginiń radıobaqylaý múmkindigi qurlyqtyń úlken aýmaǵyn - Taımyr túbeginen Soltústik Úndistanǵa deıingi aralyqty qamtıdy.

Ǵarysh apparaty radıobaqylaý aýmaǵynda bolǵan kezde kún saıyn úsh kúndizgi jáne úsh túngi seans júrgiziledi. Bir seanstyń ortasha uzaqtyǵy 5-10 mıınýt. Bul aralyqta spýtnıkke baǵdarlamalyq buıryqtar paketi beriledi, sondaı-aq, apparat jınaǵan aqparattar túsiriledi.

Sara Qabıqyzy