Qazaqstandyq jelaıaq, álem chempıony Nora Djerýto dopıng daýyna ilikti

ASTANA. QazAqparat – Jeńil atletıkadan Álem chempıony, Qazaqstan quramasynyń múshesi, Altay Athletics klýbynyń jetekshi jelaıaǵy Nora Djerýto dopıng qoldandy degen kúdikke ilindi, dep habarlaıdy QazAqparat tilshisi.

Osylaısha 27 jastaǵy jelaıaq alda bolatyn jarystardan ýaqytsha shettetilip otyr. Mundaı sheshimdi jeńil atletıkadaǵy jaǵymsyz qubylystarmen kúresetin táýelsiz organ Athletics Integrity Unit (AIU) qabyldaǵan.

AIU saıtynda Nora Djerýtonyń kúdikke ilingeni týraly jazba 5 sáýirde berilgeni aıtylǵan. Taǵylyp otyrǵan kúdiktiń egjeı-tegjeıi týraly málimette: «Tyıym salynǵan zatty/tásildi (ABP) qoldaný (2.2 bap)», - degen sıpattam berilgen.

Kenııa týmasy Qazaqstanǵa 2017 jyly qonys aýdaryp, 2019 - 2022 jyldar aralyǵynda Qazaqstan atynan jarystarǵa qatysý quqyǵyn rásimdeýmen aınalysty. Oǵan deıin óskemende irgesi qalanǵan Altay Athletics klýbynyń atynan synǵa túsip júrdi.

Byltyrdan beri Qazaqstan atynan resmı jarystarǵa qatysa bastaǵan sportshy 3000 metr qashyqtyqqa kedergilermen júgirý saıysynda Álem chempıony atanǵan bolatyn. Bul Qazaqstannyń atalǵan sport túrinen Álem birinshiliginde ıelengen alǵashqy altyn medali.