Qazaqstandyq jaýyngerler 37 eldiń áskerıleri bas qosqan oqý-jattyǵý jıynyna qatysty

NUR-SULTAN. QazAqparat - QR Qorǵanys mınıstriniń birinshi orynbasary – Qazaqstan Respýblıkasy Qarýly kúshteri Bas shtabynyń bastyǵy, general-leıtenant Marat Qusaıynov «Efes – 2022» kópultty jaýyngerlik oqý-jattyǵýynyń belsendi kezeńin baqylaý úshin Túrkııa Respýblıkasyna jumys saparymen bardy, dep habarlaıdy QR QM baspasóz qyzmeti.

Oqý-jattyǵýlar Túrkııa Respýblıkasynyń Izmır qalasy mańyndaǵy «Doǵanbeı» polıgonynda ótip jatyr. Oǵan 37 eldiń áskerı ókilderi, onyń ishinde Qazaqstan Qarýly kúshteriniń áskerı qyzmetshileri de qatysýda.

Manevrler barysynda túraralyq toptar quramyndaǵy ózara is-qımyl pysyqtaldy.

Oqý-jattyǵýǵa qatysýshylardyń birlesken is-qımyldary áskerı sheberlik deńgeıin kóterýge, jeke quramnyń qajetti jaýyngerlik daǵdylaryn arttyrýǵa jáne arnaıy operatsııalar kúshteri bólimsheleriniń jaýyngerlik daıarlyǵyn jetildirýge baǵyttalǵan. Sondaı-aq, is-sharalar barysynda olardyń problemalardy sheshý daıyndyǵy pysyqtalmaq.

Bizdiń áskerı qyzmetshiler teńiz desantyn túsirýdi qamtamasyz etýge qatysyp, parashıýtpen sekirdi. Mergender juby sheberlikterin kórsetti. Sondaı-aq, armııa avıatsııasy men basqarylatyn oq-dárilerdi nysanaǵa alýdy tájirıbe túrinde pysyqtady.

Sapar barysynda general-leıtenant Marat Hýsaınovtyń Túrkııa Ulttyq qorǵanys mınıstri Hýlýsı Akarmen jáne Túrkııa Qarýly kúshteri Bas shtabynyń bastyǵy armııa generaly ıAshar Gúlermen jumys kezdesýleri ótip, Qorǵanys ónerkásibi komıtetiniń oqý-jattyǵýlardy basqarý jáne kórme ortalyǵyna bardy.