Qazaqstandyq jaýyngerdiń súıegi 78 jyldan soń Reseıden týǵan jerine jetkizildi
«Qaza tapqan maıdangerdiń súıegi sáýir aıynyń basynda Smolensk oblysynyń Temkın aýdanynda izdeý-barlaý ekspedıtsııasyn ótkizý kezinde tabyldy. Saqtalyp qalǵan moıyntumarynyń arqasynda jaýyngerdiń esimi anyqtaldy. 9 mamyrda áskerı bortpen sarbazdyń súıegi Nur-Sultan qalasyndaǵy avıatsııa bazasyna jetkizildi», delingen habarlamada.
Qazaqstan Qarýly kúshteri áskerı basshylyǵynyń, Qazaqstandaǵy Reseı elshiligi qyzmetkerleriniń jáne avıabazanyń jeke quramynyń qatysýymen áskerı rásimderdi saqtaı otyryp, súıekti týǵan jerine jerleý úshin týystaryna tapsyrdy.
«Búgin biz maıdannan oralmaǵan sarbazdarǵa taǵzym etip, jerlesimiz Medet Amanjolovtyń súıegin eline 78 jyldan keıin týǵan-týystaryna tabystaýǵa jınaldyq. Sol ýaqytta Qazaqstanda 12 atqyshtar, 4 kavalerııalyq dıvızııa, 7 brıgada, 50 polk qurylǵan bolatyn. Sarbazdarynyń erligin urpaǵymyz umytpaýy tıis», - dedi QR QK Áýe qorúanys kúshteri bas qolbasshysynyń orynbasary polkovnık Álim Ybyraev.
Medet Amanjolov Qaraǵandy oblysy Shet aýdany Jasterek aýylynyń týmasy. Soǵys aldynda ol áskerge shaqyrylyp,1941jyly 24jasynda maıdanǵa birden attandy. Onyń sońǵy qyzmet orny 125-shi jeke atqyshtar brıgadasynyń jeke barlaý rotasy edi.
Sarbazdyń týystary áli de sol Shet aýylynda turyp jatyr.1942 jyly onyń otbasyna Smolensk qalasyn qorǵaý kezinde Medet Amanjolovtyń qaza bolǵany týraly habar alady. Kóp jyldar boıy urpaqtary onyń jerlengen jerin taba almaǵan, biraq 78 jyldan keıin jaýyngerdi týǵan jerine jerleýge múmkindik týdy.
«Bizge qońyraý shalyp, atamyzdyń súıeginiń tabylǵanyn habarlady. Biz tańqalǵanymyz sonsha, tipti eshteńe aıta almadyq. Sodan keıin bizge elshilik pen áskerıler kómek kórsetti. Qazir ony týǵan jerine aparamyz», - dep oıymen bólisti tabylǵan sarbazdyń nemeresi Murat Amanjolov.