Qazaqstandyq jastar arasyndaǵy lýdomanııa problemasy talqylandy

ASTANA. QazAqparat - Semeı qalasynda Memlekettik keńesshi Erlan Qarınniń tóraǵalyǵymen Prezıdent janyndaǵy Jastar saıasaty jónindegi keńestiń otyrysy ótti, dep habarlaıdy Aqordanyń baspasóz qyzmeti.

Keńes otyrysynda zańsyz oıyn bıznesimen kúres jáne qazaqstandyq jastar arasyndaǵy lýdomanııa problemasy talqylandy.

Jıynǵa keńes múshelerimen qatar Mádenıet jáne sport mınıstrliginiń basshylyǵy, Parlament Májilisiniń depýtattary, úkimettik emes uıymdardyń ókilderi qatysyp, zańsyz oıyn bıznesimen kúres, zańnamalyq baǵyttaǵy usynystary, lýdomanııadan ońaltý máselesi boıynsha atqaryp jatqan jumystary jaıynda aıtty.

Erlan Qarın memlekettik organdar men qoǵamdyq ınstıtýttar birlesip áreket etkende ǵana lýdomanııamen kúrestiń tıimdi júzege asatynyn atap ótti. Memlekettik keńesshi Keńes múshelerin qazaqstandyq jastardyń ózekti problemalaryn tıimdi sheshý úshin jastar saıasaty salasynyń kún tártibin qalyptastyrýǵa jáne ony belsendi iske asyrýǵa shaqyrdy.

Jumys kezdesýiniń qorytyndysy boıynsha memlekettik organdardyń jurtshylyqty aqparattyq-profılaktıkalyq jumysqa tartý barysynda qoldanatyn naqty usynymdary ázirlendi.