Qazaqstandyq jas tennısshi Túrkııadaǵy týrnırdiń chempıony atandy

ASTANA. QazAqparat – Qazaqstandyq Eva Korysheva Ystanbul qalasynda ótken 14 jasqa deıingiler arasyndaǵy ekinshi sanatty Tennis Europe týrnıriniń chempıony atandy, dep habarlaıdy QazAqparat tilshisi.

Qazaqstan tennıs federatsııasynan málim etkenindeı, bedeldi dodaǵa Eýropanyń 64 sportshysy qatysyp, baq synady.

Aqtóbe tennıs mektebiniń túlegi E. Korysheva jarystyń 4-raketkasy bolyp tirkeldi. Ol fınalda Chehııanyń osy jastaǵylar arasynda 9-raketkasy ıAna Kovachkovany 6:1, 7:6 esebimen utty. Osylaısha, Eva sporttyq jolynda jekeleı synda Tennis Europe týrnırinde úshinshi ret úzdik shyqty.

E. Korysheva qazirgi kezde Eýropa tennıs federatsııasynyń reıtıngisinde 61-orynda tur. Túrkııadaǵy jeńisi arqasynda seısenbide jańartylatyn reıtıngide joǵary kóterilmek.

Eske sala keteıik, budan buryn Aleksandr Býblıktiń Frantsııadaǵy Marsel týrnıriniń fınalyna óte almaǵanyn jazǵan bolatynbyz.

Foto: Qazaqstan tennıs federatsııasy