Qazaqstandyq jas tennısshi Grýzııadaǵy jarysta absolıýtti jeńimpaz atandy
Almaty tennıs mektebiniń túlegi jekeleı synda fınalda osy týrnırdiń birinshi raketkasy, reseılik Artem Semenovti 6:3, 6:1 esebimen tize búktirdi.
Bul onyń Eýropadaǵy alǵashqy tıtýly edi. A.Trebýhın sonymen qatar almatylyq Rodıon Lýkashovpen birge juptyq synda sońǵy básekede reseılikter Ivan Makarov – Mıroslav Morozovtan aılasyn asyrdy – 7:5, 6:2.
Tbılısıde 16 jasqa deıingiler arasynda aqtóbelik Demıd Gorbachev fınalǵa deıin jetip, sheshýshi oıynda Eýropanyń 15-raketkasy, reseılik Sava Rybakınge jol berdi – 4:6, 6:7 (3:7).
Degenmen D.Gorbachev juptyq synda ese qaıyryp, Mansur Shákenmen birge fınalda reseılikter Vladımır Kadobıne – Anton Katartsevti utty – 6:2, 6:0.
Rıga qalasynda ekinshi sanattaǵy Eýropa dodasynda 12 jasqa deıingiler arasynda Jantóre Sanjaruly jekeleı jáne juptyq synda fınalıst atandy. Fınalda jekeleı synda ol fınlıandııalyq Aleks Toýmollınge ese jiberdi – 0:6, 3:6. Juptyq synda ulybrıtanııalyq Hakım Kamalmen birge latvııalyq Gýstavs Brıtts – A.Toýmollınnen utylyp qaldy – 1:6, 2:6.
Chernogorııada 18 jasqa deıingiler arasynda tórtinshi sanattaǵy ITF týrnırinde qazaqstandyq Satı Áýbákirova juptyq synda fınalǵa deıin jetti. Sońǵy básekede qytaılyq Ifeı Hýangpen birge ıtalııalyqtar Anastasııa Bertachchı – Francheska Gandolfıden jeńildi – 0:6, 4:6.
Sondaı-aq Shymkent qalasynda ATF (Azııa tennıs federatsııasy) serııasy boıynsha 16 jasqa deıingiler arasynda halyqaralyq jarys márege jetti. Munda bozbalalar arasynda elordalyq Vıacheslav Kýfeld jeńis tuǵyryna kóterildi. Juptyq synda aqtóbelik Svıatoslav Býreev pen shymkenttik Imanǵalı Rahymbaevtyń baǵy jandy. Qyzdar arasynda almatylyq Polına Sleptsovanyń mereıi ústem boldy. Juptyq synda shymkenttik Ádemi Amankeldi men ózbekstandyq Shahzoda Artyqbaeva chempıon atandy.
Eske sala keteıik, budan buryn Anna Danılınanyń Frantsııadaǵy týrnırdiń chempıony atanǵanyn jazǵan bolatynbyz.
Sondaı-aq Qazaqstannyń birinshi raketkasy álemdik reıtıngide 37-orynǵa kóterildi.