Qazaqstandyq jas shahmatshylar Azııa chempıonatynda 18 medal jeńip aldy

NUR-SULTAN. QazAqparat - Shrı-Lankada ótken 18 jasqa deıingi Azııa chempıonatynda qazaqstandyq shahmatshylar 9 altyn, 3 kúmis jáne 6 qola medaldi qanjyǵaǵa baılady. Týrnırge álemniń 23 elinen 572 sportshy qatysty, dep habarlaıdy QazAqparat QR shahmat federatsııasyna silteme jasap.

Toǵyz týrdan soń klassıkalyq shahmatta birinshi oryn almatylyq Dımash Týlendınovke buıyrdy, kúmis medaldi Qyzylordadan Nazerke Nurǵalı jeńip aldy, al atyraýlyq Zarına Nurǵalıeva, Shymkentten Zeınep Sultanbek jáne de ońtústik astananyń ókilderi Alýa Nurmanova men Ksenııa Balabaeva chempıonattyń qola júldegeri atandy.

«Jastar keremet oıyn kórsetti.Bıyl medaldar sany ótken jylmen salystyrǵanda eki ese kóp ekenin aıta ketken jón», - deıdi balalar men jasóspirimder quramasynyń jattyqtyrýshysy Anýar Ismaǵambetov.

Sondaı-aq, rapıd pen blıts týrnırleriniń nátıjesi boıynsha qazaqstandyqtar 8 altyn, 2 kúmis jáne 2 qola medal jeńip aldy. Klassıka týrnırindegi barlyq jeńimpazdar óz dárejelerin FIDE sheberine úmitkerge deıin kóterdi.

«Balalardyń Shrı-Lankadaǵy nátıjeleri jastar arasyndaǵy shahmattyń kóterilip kele jatqanyn kórsetti. ıÝnıorlar arasyndaǵy jasy úlkenderi kóp uzamaı respýblıkanyń atynan eresekter arasyndaǵy týrnırlerge qatysady», - deıdi Qazaqstan shahmat federatsııasynyń atqarýshy dırektory Irına Grışenko.

Chempıonatta jas sportshylar shahmattyń klassıka, rapıd jáne blıts partııalarynda jarysty. Týrnırde jas jigitter men qyzdar alty jas sanaty boıynsha baq synady: 8, 10, 12, 14, 16 jáne 18 jasqa deıin.