Qazaqstandyq jas ónertapqysh shól dalada aǵash egýdiń tıimdi jobasyn oılap tapty
Jobanyń avtory Báıdibek Musaev Qyzylorda qalasyndaǵy Nazarbaev mektebinde bilim alady. Ol aımaqtyń ekologııalyq ahýalyn jaqsartý maqsatynda ekologııalyq jobany júzege asyrýdy qolǵa alyp otyr. Mektepte oqý ozaty atanǵan jas ónertapqysh biraz ýaqyttan beri aǵash egýdiń tıimdi jolyn qarastyryp júrgen bolatyn. Osylaısha óńirde jas jelek sanyn molaıtýǵa bolatynyna kóz jetkizdi. Bul maqsatta Eco-plant jobasyn qolǵa aldy.
Atalǵan mashına kún sáýlesinen qýat alady. Sondyqtan oǵan kóp shyǵyn qajet emes. Bul qarjyny únemdeýge jol ashady. Oǵan qosa atalǵan tehnıka arqyly shóldi jáne dalaly aımaqtarda da tal egýge ábden bolady.
«Eki qanattan turatyn qurylǵyda eki úlken tsılındr ornalasqan. Onyń úlkeninde kóshetter men aǵash otyrǵyzýǵa arnalǵan suıyqtyqtar bar. Sondaı-aq, munda burǵylaý qondyrǵysy jáne topyraq pen tyńaıtqysh qoımasy ornalastyrylǵan. Qurylǵy negizinen Tesla Semi júk kóligimen birge jumys isteıdi. Soǵan baılanysty paıdalanýshyǵa kóptegen múmkindik qarastyrylǵan. Atap aıtqanda, burǵylaý qondyrǵysy aǵashty otyrǵyzý aldynda topyraqty qopsytyp daıyndaı alady. Al tyńaıtqyshy bar suıyqtyq bagy bir ýaqytta topyraq qunaryn jaqsartýdy jeńildetedi. Topyraqtaǵy ottegi kontsentratsııasy, ylǵaldylyǵy men kómirqyshqyl gazyn anyqtaıtyn datchıkter tyńaıtqyshtar men sý mólsherin durys tańdaýǵa kómektesedi», - deıdi ol.
Aıta keteıik, onyń bul aǵashtyń jyldam ósýin qamtamasyz etýine óz áseri bar. Kún batareıalarynyń kómegimen qurylǵy elektr júk kóliginiń energııasyn únemdeıdi. Avtomatty mashına topyraqty qopsytyp, aǵashty túsirý úshin jáne shuńqyrdy topyraqpen toltyryp, qurylǵyny qaıta zarıadtaýǵa nebári alty mınýt jumsaıdy.
Jas ónertapqysh Eco-plant júk kóliginiń birqatar artyqshylyǵyna toqtaldy. Bul tehnıka ormandy qalpyna keltirý mashınalaryn shyǵaratyn Bracke Forest qurylǵysyna qaraǵanda tıimdi. Aǵashty durys ári tez otyrǵyzady.
Sondaı- aq, qyzylordalyq jas ónertapqyshtar «aqyldy» jylyjaı qurastyrdy.