Qazaqstandyq jas ónertapqysh sheteldikinen 10 ese arzan bıonıkalyq protez jasap shyǵarýda

ASTANA. QazAqparat - «100 jańa esim» jobasyna qatysýshy, jas ónertapqysh Máýlen Bekturǵanov Qazaqstanda jasalǵan bıonıkalyq protezderdi qanshaǵa satyp alýǵa bolatynyn aıtty, dep habarlaıdy QazAqparat tilshisi.

Máýlen Bekturǵanov «100 jańa esim» jobasy shabyt beretinin aıtady.

«Men bıonıkalyq protezderdi jasaýmen aınalysamyn. Biz Almatydamyz. Osymen tórtinshi protezdi jasadyq. Sheteldik protezdermen salystyrǵanda bizdegi baǵa on ese arzan. Árbir klıentke jeke protez jasalady, baǵasy 500 myń teńgeden joǵary. Trenajerlar, kúsh túsetin protezderdi, shyntaq, aıaq, protezderin jasaımyz, arbaǵa jegilgenderdiń júrýine kómektesetin korsetterdi jasaý jaǵyn qarastyryp jatyrmyz», - deıdi Máýlen.

Onyń tsehynda jasalatyn balalarǵa arnalǵan bıonıkalyq protezderdi Qazaqstanda eshkim jasaı almaıdy. Aıta keteıik, Máýlen Aqmola oblysyndaǵy Zerendi kóliniń jaǵasynda qurylǵan jastar bilim berý lagerine qatysty.

«Mundaı kezdesýler, ózgelerdiń qalaı bıznes ashqanyn, neden bastap, nendeı qıyndyqtarǵa dýshar bolǵanyn aıtý jastardyń oılaý qabiletin jaqsartý úshin óte qajet. Sońǵy eki-úsh jylda jastar arasynda startaptarmen, qosymshalarmen, robot tehnıkasymen aınalysý trendke aınalǵan. Osy ındýstrııa qazir damyp keledi. Jastardyń yntasy qýantady. 10 jyldan keıin olar jaryp shyǵady dep oılaımyn», - deıdi jas ónertapqysh.

Eske sala keteıik, Aqmola oblysyndaǵy Zerendi demalys aımaǵynda jastardyń respýblıkalyq bilim berý lageri ashyldy. Munda jastar uıymdarynyń basshylary, kásipkerler, «Qazaqstannyń 10 jańa esimi» jobasynyń jeńimpazdary - jalpy 300-den astam qatysýshy kelgen. 12 tamyzda bastalǵan lager jumysy 16 tamyzǵa deıin jalǵasady.