Qazaqstandyq «Zere» fılmi Mınsk kınofestıvalinde kórsetildi

ALMATY. QazAqparat - Qazaqstandyq «Zere» fılmi «Listapad» kınofestıvalinde júldeli orynǵa ıe boldy, dep habarlaıdy QazAqparat tilshisi.

Sháken Aımanov atyndaǵy «Qazaqfılm» kınostýdııasy taratqan málimetke sensek, halyqaralyq Mınsk kınofestıvalinde úzdik dybystyq (mýzykalyq) sheshim úshin júlde qazaqstandyq kompozıtor Dana Zýlpyharǵa «Zere» fılmindegi jumysy úshin berildi.

«Listapad» - Belarýstegi kıno salasynyń eń iri festıvalderiniń biri. Bıyl festıval 4-11 qarasha aralyǵynda ótti. Oǵan otandyq rejısser Dáýren Qamshybaevtyń «Zere» tolyqmetrajdy kartınasy qatysty.

Aıta keteıik, «Zere» fılmi «Qazaqfılm» kınostýdııasy, Qara Production, Libertus Film, cinema D jáne Jambyl oblystyq kıno ortalyǵynyń qoldaýymen túsirildi.

«Zere» - qazaqstandyqtarǵa jaqyn sıýjeti bar drama. Ol kúıeýiniń qaıǵyly qazasynan keıin qyzyn aýyldaǵy eń baı jáne yqpaldy adamǵa áıel retinde satpaq bolǵan kezde anasynyń erkine qarsy shyqqan bostandyqty súıetin qyz týraly. Biraq Zere tákappar Talap esimdi balyqshy jigitke ǵashyq bolyp, jasyryn úılený úshin onymen birge qashyp ketedi.

Kınokartınada basty rólderdi Adına Bajan, Sanýrjan Súleımenov, Murat Bısembın, Berik Aıtjanov, Olga Landına, Eljas Rahım jáne basqa da akterler somdady. Fılmniń túsirilimi Balqash kóliniń mańynda, Moıynqum qumdarynyń fonynda ornalasqan Taısoıǵan balyq aýlaý aralynda ótti.

Sondaı-aq qyrkúıek aıynyń sońynda Máskeýdegi «Kınoshok» festıvaliniń tolyqmetrajdy fılmder baıqaýynda qazaqstandyq «Zere» fılmi Úzdik mýzyka nomınatsııasyn jeńip alǵan bolatyn.