Qazaqstandyq zaýyttar K-4 jáne K-5 standarttaryndaǵy munaı ónimderin shyǵarady

ASTANA. QazAqparat - Úkimet úıinde ótken baspasóz máslıhatynda QR Energetıka mınıstri Qanat Bozymbaev Qazaqstannyń barlyq munaı óńdeý zaýyttary 2018 jylǵa deıin K-4, K-5 standarttaryna aýysyp úlgere me degen suraqqa jaýap berdi.

Mınıstrlik basshysynyń habarlaýynsha, Shymkenttegi MÓZ negizgi qondyrǵylardy, onyń ishinde otyndy gıdrotazartý qondyrǵysyn jóndeý boıynsha jumystardy aıaqtady.

«Bul K-4, K-5 standarttaryndaǵy otyndy óndirýge múmkindik beretin basty qondyrǵylar jáne Shymkent MÓZ bul otyndy esh kedergisiz óndire alady. Atyraý men Pavlodar munaı óńdeý zaýyttaryna keler bolsaq, olardyń úlgerý-úlgermeýi qarasha aıynda belgili bolmaq. Degenmen, úlgeredi dep tolyq senimmen aıta alamyn», - dedi Qanat Bozymbaev.