Qazaqstandyq zaǵıp týraly derekti fılmi Serbııadaǵy festıvalge qatysady

KRÝShEVATs. QazAqparat - Rejısser Vladımır Tıýlkın túsirgen «13 shaqyrym» derekti fılmi Serbııanyń Krýshevats qalasynda 25-28 qyrkúıekte ótetin Halyqaralyq «Rýhy bıik» («Sılnye dýhom») pravoslavıelik fılmder festıvaliniń negizgi baǵdarlamasyna iriktelinip alyndy, dep habarlaıdy QazAqparat «Qazaqfılm» kınostýdııasyna silteme jasap.

Atalǵan fılmdi QR Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» AQ túsirdi. 

«13 shaqyrym» atty derekti fılm Serik Bodanbaev esimdi zaǵıp týraly baıandaıdy. Qystaýdan óz aýylyna qaraı bet alǵan basty keıipker óz ómiriniń eleýli sátterin eske alyp, óz boıyndaǵy qundylyqtarynyń syryn ashady. 

«Fılmniń basty keıipkeri - rýhy bıik tulǵa. Janarynan aıyrylsa da, qıyndyqtarǵa moıymaı, óz bolashaǵyn oılaıdy. Bul festıvalge sol úshin de unaǵan bolar», - deıdi fılmniń rejısseri Vladımır Tıýlkın. 

Aıta keterligi, «Rýhy bıik» festıvali Serbııanyń pravoslavıelik shirkeýi men Halyqaralyq pravoslavıelik halyqtardyń birligi qoǵamdyq qorynyń qoldaýymen ótkiziledi. 

FOTO: brod.kz