Qazaqstandyq velotrekshiler Olımpıadanyń úsh joldamasyna ıe boldy
Qazaqstan velosport federatsııasy málim etkenindeı, Halyqaralyq velosıpedshiler odaǵy (UCI) velotrekshiler alǵan lıtsenzııalar sanyn resmı túrde bekitti.
Berlınde trektegi velosporttan ótken álem chempıonatynda tabysty óner kórsetýdiń arqasynda qazaqstandyqtar úsh kvotaǵa qol jetkizdi. Omnıýmda jetkilikti upaı jınaǵan Rıo Olımpıadasyna qatysqan Artem Zaharov elimiz velotrekshileri arasyndaǵy kóshbasshylyq rólin dáleldedi. Jekeleı sprınt pen keırınnen de joldama buıyrdy. Sprınttik qashyqtyqtarda Qazaqstan quramasy tuńǵysh ret joldamaǵa ıe boldy. Álem chempıonatynda keırınnen ótken fınalda tamasha óner kórsetken Sergeı Ponomarev buǵan úlken úles qosty.
«Budan buryn shosseden tórt joldama alǵan edik. Shosseden úsh sheberimiz toptyq básekede, bireýi jeke qashyqtyqta synǵa túsedi. Endi, mine, trekten úsh joldama alyp otyrmyz. Ásirese, sprınterlerdiń alǵash ret Olımpıadaǵa attanatyny Qazaqstanda bul sport túriniń josparly túrde damyp kele jatqanyn kórsetedi», dedi Qazaqstan velosport federatsııasynyń prezıdenti Nurlan Smaǵulov.
Osylaısha velosporttan ulttyq qurama jeti lıtsenzııany jeńip alyp otyr. Endi olar Olımpıadaǵa deıin birneshe jattyǵý jıyndaryn ótkizedi.