Qazaqstandyq vaktsınanyń sapasy sheteldik vaktsınadan kem bolmaıdy - professor
«Qazirgi ýaqytta qazaqstandyq belsendendirilgen COVID-19 vaktsınasyn klınıkaǵa deıingi zertteýler aıaqtalyp qaldy. Bizdiń vaktsınanyń sapasy men qaýipsizdigi Ulybrıtanııa, AQSh, Reseı sııaqty birqatar eldegi belgili analogtardan kem emes. Zerthanalyq janýarlar: qoıan, teńiz shoshqasyna klınıkaǵa deıingi zertteýler júrgizildi. Olar vaktsınamyzdyń qaýipsizdigi men ımmýnogendiligin tekserý úshin qoldanylady. Gýmanıtarlyq zertteýler qyrkúıek aıynda bastalady dep josparlanǵan», - deıdi professor Berik Haırýllın.
Onyń aıtýynsha, qazaqstandyq ǵylymnyń áleýeti zor jáne álemdik deńgeıdegi ǵylymı zertteý jasaı alady.
«Áleýmettik jelilerde qazaqstandyq ǵylymnyń bolashaǵy joq ekendigi týraly aqparattar tarap júr. Bizdiń ınstıtýttyń ashylǵanyna 60 jyldan asty. Bul bizdiń adamnyń ınfektsııalyq vırýstyq aýrýyna qarsy oılap tapqan besinshi vaktsınamyz. Jyl mezgilderinde bolatyn tumaýǵa qatysty vaktsınaǵa zertteý jumysy Almatydaǵy 2000 erikti adamǵa jasaldy. Eshqandaı keri áser bolǵan joq. Biz vaktsınany birinshi ret jasap otyrǵan joqpyz, ózge elder jasap shyǵara alatyn vaktsınany biz de jasaı alamyz. Qus jáne dońyz tumaýyna qarsy alǵash jasaǵan vaktsınamyz Reseıde synalǵan. Bári jaqsy ótken, eshqandaı keri áser bolmady. Dúnıejúzilik densaýlyq saqtaý uıymynyń bizdiń vaktsınany tirkep qoıýy bizdiń múmkindigimiz qandaı ekeninen habar beredi. TMD boıynsha bizdiń el DDSU vaktsınasyn tirkegen Reseıden keıingi ekinshi el. Bastysy - ózimizge senýimiz kerek. Ár memleket aldymen óz vaktsınasyn testten ótkizedi. Biz ata, apa, áke-sheshemizdi, medıtsınalyq qyzmetkerlerdi qorǵaýymyz kerek. Jaqsy vaktsına jasap shyǵarýǵa mindettimiz jáne jasap shyǵaramyz», - deıdi ol.