Qazaqstandyq vaktsına shyǵaratyn zaýytqa kim jaýapty – Májilis tóraǵasy

NUR-SULTAN. QazAqparat – Májilis tóraǵasy Nurlan Nyǵmatýlın qazaqstandyq vaktsına shyǵarý boıynsha Jambyl oblysynda salynyp jatqan zaýytqa kimniń jaýapty ekenin synǵa aldy, dep habarlaıdy QazAqparat.

«Mınıstrlikterdiń qaısysy bul zaýyt úshin jaýapty? Lentalary qıyldy, Alekseı Vladımırovıch (Alekseı Tsoı – densaýlyq saqtaý mınıstri – red.) PR naýqanyn júrgizdi. Endi, zaýytta qashan ónerkásiptik óndiris bastalady? BǴM «meniki emes» dep otyr. Tsoı myrza «tek tutyný men uıymdastyrýdy» aıtady. Sonda kim jaýapty?», - dedi N. Nyǵmatýlın Májilistiń jalpy otyrysynda.

Atalǵan jumystarmen aınalysyp júrgen Eraly Toǵjanov issaparda bolǵandyqtan, suraqqa Premer-Mınıstrdiń birinshi orynbasary Álıhan Smaıylov jaýap berdi.

«Suraý Úkimetke salynatyn bolady. Úkimette Premer-Mınıstr orynbasary Eraly Toǵjanov aınalysyp júr. Mınıstrler arasynda – Bilim jáne ǵylym mınıstrligi. Qazir barlyq tehnıkalyq jumystaryn ákimdik júrgizedi. Olar tehnıkalyq bóligin bitirgen soń, Bilim jáne ǵylym mınıstrliginiń balansyna beriledi», - dep jaýap berdi Á. Smaıylov.

«Ázirge ózderińizge de túsiniksiz bolyp otyrǵanyn kórdik. Álıhan Ashanuly (Smaıylov – red.), úlken ótinish, «qoıshy kóp bolsa, qoı aram ólediniń» keri bolmasyn. Bul óte mańyzdy joba. Halyq, qoǵam vaktsınany kútip otyr. Qansha málimdeme jasalǵan soń, endi uıymdastyrýdy qolǵa alyńyzdar. Álıhan Ashanuly Úkimettiń jaýapty ekenin aıtty. Úkimette de naqty adamdar bar. Sizder suraǵan qarajat berildi. Endi taǵy qosymsha surap otyrsyzdar, taǵy bólinip jatyr. Bári ózderińizge baılanysty, ýaqyt jyldam ótedi de ketedi», - dedi Nurlan Nyǵmatýlın.