«Qazaqstandyq ultaralyq tatýlyq - búkil álem úshin beıbitshilik formýlasyna aınaldy» - Májilis depýtaty Zýhra Saıapova

ASTANA. QazAqparat - Qazaqstandaǵy ultaralyq tatýlyq  - beıbitshilik formýlasyna aınaldy. Ol búkil álemdik qoǵamdastyq úshin - etalon. Búgingi tańda kóptegen elder ultaralyq tatýlyq máselesi boıynsha Qazaqstan halqy Assambleıasynyń keńesmine júginýde.

Bul jóninde búgin Astanada Ortalyq kommýnıkatsııalar ortalyǵynda ótken baspasóz máslıhatynda Májilis depýtaty Zýhra Saıapova málimdedi.

Onyń aıtýynsha, Qazaqstan halqy Assambleıasy bıyl óziniń aldaǵy  18 sáýir kúni Astana qalasynda ótetin 21-sessııasyna jaqsy daıyndyqpen kelip otyr. Kúni búgingi deıin Assambleıa týraly arnaıy zań men doktrına qabyldandy.

«Qazaqstan halqy Assambleıasynyń qajyrly eńbeginiń arqasynda búginde elimizdegi ultaralyq tatýlyq - jergilikti halyqtardyń mentalıtetine aınaldy», -  dedi Májilis depýtaty Zýhra Saıapova.

«Kezinde BUU burynǵy Bas hatshysy Kofı Annan myrza bizdiń jumysymyzben tanysyp: Qazaqstan halqy Assambleıasy - beıbitshilik modeline aınalǵanyn atap ótken bolatyn»,  - dedi óz kezeginde Májilis depýtaty Ahmet Muradov.

Onyń aıtýynsha, búginde Assambleıa tek ultaralyq máselelerdi ǵana emes, basqa da barlyq qoǵamdyq máselelerdi talqylap, naqty usynystar aıta alatyn dárejege jetip otyr.

Esterińizge sala keteıik, Qazaqstan halqy Assambleıasy atynan búginde toǵyz adam -  Parlament Májilisiniń depýtaty.