Qazaqstandyq ýákil jetkilikti turǵyn úı máselesi jónindegi BUU-nyń arnaıy baıandamashysymen kezdesti

ASTANA. Qyrkúıektiń 8-i. QazAqparat - Búgin Astanada QR-daǵy adam quqyqtary jónindegi ýákil Asqar Shákirov jetkilikti turǵyn úı máselesi jónindegi BUU Arnaıy baıandamashysy Rakel Rolnıkpen kezdesti, dep habarlaıdy Adam quqyqtary jónindegi ýákil apparatynyń baspasóz qyzmeti.

BUU Arnaıy baıandamashysy R. Rolnık 2010 jylǵy qyrkúıektiń 6-y men 13-i aralyǵynda Qazaqstanda bolady, onyń saparynyń maqsaty Qazaqstanda jetkilikti turǵyn úıge beriletin quqyqtar jáne osymen baılanysty basqa da quqyqtardyń iske asyrylýyn baǵalaý bolyp tabylady.

Qazaqstandyq Ombýdsmen qonaqty Adam quqyqtary jónindegi ýákil mekemesi jumysynyń erekshelikterimen, shaǵymdardyń qaralý tártibimen, halyqaralyq quqyq qorǵaý konventsııalary men kelisim-sharttar iske asyrylǵanda memlekettik organdar men úkimettik emes uıymdarmen ózara árekettesýdiń tájirıbesimen, sondaı-aq azamattardyń turǵyn úıge beriletin quqyqtaryn qamtamasyz etý salasynda mekeme qyzmetiniń negizgi baǵyttarymen tanystyryp ótti.

BUU Arnaıy baıandamashysy memlekettiń álemdik ekonomıkalyq daǵdarys saldarlaryna tózý boıynsha kóp qyrly qyzmetine, negizinen, Qazaqstan Úkimetiniń azamattardyń anaǵurlym osal sanattarynyń, naqty aıtqanda kiris deńgeıi az januıalardyń, oralmandardyń jetkilikti turǵyn úıge beriletin quqyqtaryn qorǵaý boıynsha sharalardyń qoldanýyna nazaryn aýdardy.

Taraptar adamnyń turǵyn úıge beriletin quqyqtaryn qorǵaý, qoljetimdilik máselelerinde azamattyq qoǵammen memlekettiń ózara árekettesýi, turǵyn úıdi bólip berý, turǵyn úı saıasatynda memlekettik-jeke áriptestiktiń keńeıýi salasynda eldiń zańnamasyn ári qaraı jetildirý mańyzdylyǵyn atap kórsetti.

Memlekettik organdardyń ókilderimen ótken kezdesýler men alynǵan aqparatty taldaýdyń qorytyndysy boıynsha R. Rolnık 2011 jyldyń naýryzynda adam quqyqtary jónindegi BUU Keńesine usynylatyn esepti ázirleıdi.