Qazaqstandyq tutynýshylar qandaı qyzmet túrine jıi shaǵym jasaıdy

NUR-SULTAN. QazAqparat – Búgin - dúnıejúzilik tutynýshylar kúni. Osy oraıda elimizde otandyq tutynýshylardyń kóbine qandaı qyzmet túri boıynsha shaǵym jasaıtyny aıtyldy, dep habarlaıdy QazAqparat tilshisi.

«Jyl saıyn 15 naýryz dúnıejúzinde tutynýshylar kúni retinde atalyp ótedi. Ótken jyly bizdiń komıtet otandyq tutynýshylardan kelip túsken 25 223 ótinishti qarady. Onyń 55 paıyzy - bólshek saýdaǵa tıesili, 15 paıyzy - turmystyq qyzmet, 5 paıyzy - elektrondy saýda, 4 paıyzy - turǵyn úı kommýnaldyq sharýashylyǵyn jáne 3 paıyzy kólik salasyna qatysty. Bólshek saýda boıynsha taýardy 14 kúnniń ishinde keri qabyldaýdan bas tartý jaǵdaıy 34 paıyzdy qurady. Sonymen qatar ónimge qatysty aqparatty usynbaǵan jaǵdaı 12 paıyzǵa jetti», - dedi tutynýshylar quqyǵyn qorǵaý jónindegi memlekettik saıasatty qalyptastyrý basqarmasynyń basshysy Ramazan Baranov BAQ ókilderimen kezdesý barysynda.

Sondaı-aq, basqarma basshysy ótken jyly jóndeý jumysyn júrgizý jáne jıhaz jasaýǵa qatysty tutynýshylar tarapynan aıtarlyqtaı shaǵymnyń baryn jetkizdi.

Odan bólek, 2021 jyly elektrondy saýda qyzmetin qoldanýshylardan (27 paıyz) taýardy keri qaıtarýda problema bolǵany aıtyldy.